Daniel 12:1-13
12 “Tea vellar Mikael* ubo ravtolo,* to vorto kunvor zo tujea lokanchea* vatten ubo asa. Ani sonkoxttancho oslo vell ietolo, zo poilem raxttr stapon zalem tednam thaun tem tea vella* poriant ieunk na. Tea vellar tuje lok vanchtole, pustokant zanchim nanvam boroilʼlim asat, tim soglim vanchtolim.
2 Ani dhulʼlint nhidlolim asat tim zaitim zannam utt’ttholim, thoddim sasnachea jivita pasot ani dusrim loz ani sasnacho opman sosunk utt’ttholim.
3 “Zankam kholaiechi somjikai asa, te mollba bhaxen porzollttole. Ani je zaiteank nitivontponnachea vatter haddttat, te nokretram bhaxen sodam-sodankal chokchoktole.
4 “Ani tum Daniel, him utram gupit dovor, ani xevottachea kalla poriant hea pustokak xikʼko marun dovor. Zaitim zannam hanga-thoim sodhit bhonvtolim* ani khorem ginean khub vaddttolem.”
5 Uprant hanvem, Danielan, polloilem ani mhaka thoim don devdut dixtti poddle. Ek nhoim-chea hea deger ubo aslo ani dusro nhoim-chea tea deger ubo aslo.
6 Tednam nhoim-chea udkam voir mov lugttacho kopddo* ghalun aslolea munxak tantuntlea eka devdutan vicharlem: “Heo ojapacheo vostu purnn zaunk kitlo vell urla?”
7 Tednam hanvem nhoim-chea udkam voir mov lugttacho kopddo ghalun aslolo munis oxem mhunntta tem aikolem, tannem aplo uzvo ani davo hat sorga vatten voir kelo ani sodankal jivo aslolea Devacho soput gheun mhunnttlem: “Heo vostu tharailʼlea ek kalla pasot, don kallam pasot ani ordea kalla* pasot astoleo. Povitr lokanchea bollacho churo korop somptanch heo sogleo vostu purnn zatoleo.”
8 Hanvem zalear, heo vostu aikoleo punn mhaka teo somzonk nant, tor hanvem mhunnttlem: “Mhojea dhonia, hea vostuncho porinnam kitem zatolo?”
9 Tednam tannem mhunnttlem: “Daniel, tum voch. Karonn heo vostu gupit dovorleat ani xevottachea kalla poriant tancher xikʼko marla.
10 Zaite lok apleakuch nitoll kortole, te sarkem tem kortole ani apleakuch xudʼdh kortole. Ani noxtte lok noxtteponn kortole, ani noxtteam modlea konnankuch somzochem na, punn kholaiechi somjikai asloleank somzotolem.
11 “Sodanch bhettoitat tim bolidanam kaddun uddoilim tednam thaun, ani nisontton korta tosli vitt haddpi vost stapon keli tednam thaun 1,290 dis soron voitole.
12 “1,335 dis soron voita tea meren, axeun vatt polloit ravta to munis khuxal!
13 “Punn tum zalear, xevott poriant thir rav. Tum visov ghetolo, punn vell ietolo tednam tuka tuzo vantto mellonk* tum uttʼttholo.”
Footnotes
^ Hacho orth “Deva Sarko Konn Asa?”
^ Vo “Mikael uttʼttholo.”
^ Utran utor, “lokanchea putanchea.”
^ Mhunnche, sonkoxttacho vell.
^ Vo “Zaitim zannam tachi [mhunnche, pustokachi] bariksannen choukoxi kortolim.”
^ Inglez bhaxent taka “linen” mhunnttat. Xobdhkox polloi.
^ Mhunnche, tin kall ani ordo kall.
^ Vo “tujea nemlolea zagear.”
