Daniel 10:1-21
10 Persiecho Raza Sirusachea razvottkechea tisrea vorsa, Daniel, zaka Belteshazar hea nanvan vollkhotale, taka ek sondex mellʼllo. To sondex khoro aslo ani to eka vhodd zhuza vixim aslo. Daniel to sondex somzolo ani tannem jem polloilʼlem tachi taka somzonni mellʼlli.
2 Tea disamnim, hanv Daniel, tin sumanam pasot dukh korit aslom.
3 Tin sumanam pasot hanv kosleach torechem borem-borem jevonn jevunk na, ani hanvem mas khaunk na vo drakxancho soro pieunk na, ani hanvem mhojea kuddik tel pasun lavunk na.
4 Poilea mhoineachea 24-avea disa, hanv vhoddle nhoim-e lagim, mhunnche Tigris* nhoim-e lagim aslom tednam
5 hanvem voir polloilem ani mov lugttache kopdde* ghatlolo ek munis mhaka dislo. Tachea bhenddak Ufaz vattarantlea bhangracho pottʼtto aslo.
6 Tachi kudd krisolaitt* hirea sarki asli, tachem tondd zogla sarkem distalem, tache dolle zollttea chuddi* sarke asle, tache hat ani paim chokchoktolea tambea sarke distale, ani tachea utrancho avaz eka vhoddlea zomeachea avaza sarko aslo.
7 Fokot hanvem, Danielan, tem dorxon polloilem, mhojea sangata aslolea munxamnim tem pollounk na. Tori astana te thorthoronk lagle, ani te pois pollon gele ani liple.
8 Magir hanv ekloch urlom, ani hanvem tem vhoddlem dorxon polloilem tednam mhojea bhitor anik xokti uronk na, mhojem tondd samkench dhovsar* poddlem ani mhaka kainch boll uronk na.
9 Uprant hanvem to uloita to avaz aikolo, punn to uloitalo tednam hanv zomnir umto poddlom ani mhaka sust nhid lagli.
10 Punn uprant konnem tori mhaka hat lailo ani mhaka haloilo, ani tannem mhaka mhojea hatanchea adaran dimier ravonk modot keli.
11 Uprant tannem mhaka mhunnttlem:
“Daniel, tum khub opurbaiecho* zaun asa. Hanv tuka jem sangchom asam, tacher dhean di. Atam tum jea zagear asa thoim ubo rav, karonn mhaka tujea lagim dhaddla.”
Tannem mhaka oxem mhunnttlem tednam hanv koddkoddot ubo ravlom.
12 Uprant tannem mhaka mhunnttlem: “Daniel, bhienaka. Jea disa tunvem heo vostu somzon gheunk tujem mon lailem ani tunvem tujea Deva mukhar tukach khalto kelo, tea disa thaunuch tujem magnnem aikon ghetlem, ani hakach lagon hanv tujea lagim ailam.
13 Punn Persiechea rajeacho kunvor 21 dis poriant mhozo virodh korit ravlo. Uprant sogleant unchlea kunvram modlo ek kunvor,* Mikael* mhaka modot korunk ailo, ani hanv thoinch Persiechea razam kuxik ravlom.
14 Xevottachea disamnim tujea lokank kitem ghoddttolem tem hanv tuka somzaunk ailam. Karonn hem dorxon fuddarak kitem ghoddttolem tea vixim asa.”
15 Tannem mhaka him utram mhunnttlim tednam hanvem mhojem tondd zomni vatten kelem ani hanv kainch ulounk xoklom na.
16 Uprant, munxa bhaxen distalo tannem mhojea vonttank hat lailo, ani hanv ulounk laglom ani mhojea mukhar aslo taka mhunnttlem: “Mhojea dhonia, hanvem polloilam tea dorxonak lagon hanv koddkoddttam ani mhaka kainch boll na.
17 Tor hanv, mhojea dhoniacho sevok, mhojea dhonia lagim koso ulounk xoktam? Karonn atam mhaka kainch boll na, ani mhojea bhitor matso pasun jiv uronk na.”
18 Magir, munxa bhaxen distalo tannem mhaka porot hat lailo, ani mhaka ghottai dili.
19 Uprant tannem mhaka mhunnttlem: “Opurbaiechea* munxa, bhienaka. Tuka xanti asom. Ghott rav, hoi, dhir ghe.” To mhojea lagim uloita astana mhaka ghottai mellʼlli ani hanvem mhunnttlem: “Mhojea dhonia, tum uloi, karonn tunvem mhaka ghottai dili.”
20 Uprant tannem mhunnttlem: “Hanv tujea lagim kiteak ailam tem tum zannam? Atam hanv porot vochon Persiechea kunvra lagim zhogoddttolom. Hanv gelea uprant Grisacho kunvor ietolo.
21 Tori astana, sotachea borovpamnim asat teo vostu hanv tuka sangtolom. Hea vostunchea babtint tuzo kunvor Mikaelak soddun konnuch mhaka purnn toren tenko dina.
Footnotes
^ Utran utor, “Hiddekel.”
^ Inglez bhaxent taka “linen” mhunnttat. Xobdhkox polloi.
^ Holldduvo vo ghoddie hirvo fator. Inglez bhaxent “chrysolite.”
^ Vo “divtte; moxali.”
^ Inglez bhaxent “pale.”
^ Vo “khub moladik; khub manacho.”
^ Vo “sogleant unch podvi aslolo kunvor.”
^ Hacho orth “Deva Sarko Konn Asa?”
^ Vo “Khub moladik; Khub man aslolea.”
