Daniel 6:1-28
6 Akʼkhea rajeacher 120 satrap* nemlear borem zatolem oxem Dariusak dislem.
2 Tanchea voir tin vhoddle odhikari asle, tanchea modlo eklo Daniel aslo. Razak kainch luksonn zaunchem nhoi mhunn, satrap* ieun hea odhikareank soglea vostum vixim khobor ditale.
3 Dusrea vhoddlea odhikaream ani satrap-am poros Daniel chodd purto aslo, karonn taka ojapachi tank asli. Tor, razan akʼkhea rajea voir taka odhikar diunk tharailem.
4 Tea vellar, vhoddle odhikari ani satrap,* raj-karbarachea babtint Danielacher arop ghalunk kitem tori karonn sodhtale. Punn tacher arop ghalunk tankam tachea add koslich chuk vo kosloch broxttachar mellonk na. Karonn to ek patieupa sarko munis aslo ani to aplea kamachi beporva korinaslo vo broxttachar korinaslo.
5 Uprant te munis mhunnonk lagle: “Tachea Devachea kaidea sombondit tachea add kitem tori sodhun kaddlea xivai, hea Danielacher arop ghalunk amkam koslich chuk mellchina.”
6 Tor he vhoddle odhikari ani satrap* ek zomo korun raza mukhar gele ani tannim taka mhunnttlem: “Darius Raza, tum sodankal jieum.
7 Razachea soglea odhikareamnim, mukhel odhikareamnim, satrap-amnim, razachea vhoddlea-vhoddlea odhikareamnim ani razpalamnim eka-meka lagim uloun, ek rajki formonn bhair kaddchem ani lokancher bondi ghalchi mhunn chintlam. Raza, 30 dis meren konnui munis tuka soddun anik khoinchea-i deva lagim vo munxa lagim vinoti korta zalear, taka xinvanchea dholint uddouncho mhunn ami tharailam.
8 Atam raza, tunvem hem formonn bhair kaddchem ani tacher sain* marchi, jea vorvim Media ani Persiechea kaidea pormonnem konnuch tem bodlunk xokchona ani kaddun uddounk xokchona.”
9 Tor Darius Razan tea bondi ghalpachea formonnacher sain marli.
10 Punn tea formonnacher sain marlea mhunn kollʼllem tednanch Daniel aplea ghora gelo, zachea voilea malliechim zonelam Jeruzalema vatten uktim aslim. Ani sodanche bhaxen disak tin pavtti to dimi ghalun magnnem korit ravlo ani aplea Devachi vakhannʼnni korit ravlo.
11 Tea vellar te munis bhitor ghusle, ani Daniel aplea Deva mukhar vinoti kortalo ani tacho favor mellom mhunn magnnem kortalo tem tannim polloilem.
12 Tor te raza lagim gele ani tannim taka tea rajki formonnacho ugddas korun mhunnttlem: “Raza, 30 dis meren konnui munis tuka soddun anik khoinchea-i deva lagim vo munxa lagim vinoti korta zalear, taka xinvanchea dholint uddouncho mhunn tunvem eka formonnacher sain marunk nasli kai?” Razan mhunnttlem: “Hoi, Media ani Persiechea kaidea pormonnem tem formonn marlam ani konnuch tem bodlunk xokona.”
13 Tannim rokddench razak mhunnttlem: “Raza, Judachea koideam modlea Danielan, tuka ani tunvem sain marlolea formonnak matso pasun resped diunk na. Punn to disak tin pavtti magnnem korta.”
14 Hem aikotanch, razak khub khont bhogli ani Danielak koso vattauncho mhunn to chintunk laglo. Ani suria buddom poriant taka salvar korunk tannem apleachean zata tem soglem kelem.
15 Xevottak, te munis ek zomo koso ektthaim zaun raza mukhar gele ani tannim razak mhunnttlem: “Raza ugddas dovor, Media ani Persiecho kaido oso asa ki razan ek formonn marlea uprant, vo bondi ghatlea uprant, konnench ti bodlunk zaina.”
16 Tor razan hukum dilo ani tannim Danielak haddun tea xinvanchea dholint uddoilo. Razan Danielak mhunnttlem: “Tum jea Devachi seva korit asa, to tuzo Dev tuka vanchoitolo.”
17 Uprant ek fator haddun tea dholichea bhitor sorchea vatter* dovorlo, ani razan aplea xikʼko marpachea mudien ani unch kulliechea odhikareanchea mudien tacher xikʼko marlo, jea vorvim Daniela vixim ghetlolo nirnnoi konnench bodlunk zainaslo.
18 Uprant, raza aplea rajmahalant gelo. Tannem ti rat upas korun sarli ani sogle torechem monoronjon nakarlem.* Toxench, akʼkhi rat taka nhid poddonk na.*
19 Xevottak, fantodder dis uzvaddttanch raza utthlo ani begin-begin tea xinvanchea dholi lagim gelo.
20 To tea dholi lagim pavlo toso, tannem eka dukhest tallean Danielak ulo marlo. Razan Danielak vicharlem: “Daniel, jivea Devachea sevoka, tum jea Devachi seva korit asa, to tuzo Dev tuka xinvam thaun salvar korunk xoklo kai?”
21 Danielan rokddench razak mhunnttlem: “Raza, tum sodankal jieum.
22 Mhojea Devan aplea devdutak dhaddlo ani xinvanchim tonddam bond kelim. Tannim mhaka kainch vaitt korunk na. Karonn hanv Deva mukhar niropradi asam, toxench raza, hanvem tuka-i kainch vaitt korunk na.”
23 Raza ekdom khuxal zalo ani tannem Danielak tea dholintlo voir kaddunk hukum dilo. Danielak tea dholintlo voir kaddlo tednam taka kainch zaunk naslem, karonn tannem aplea Devacher visvas dovorlolo.
24 Uprant razan hukum dilo ani Danielacher arop ghatlolo* tea munxank haddle, ani tankam, tanchea bhurgeam sangata ani tanchea bailam sangata tea xinvanchea dholint uddoile. Te tea dholint sokol pavchea poilinch, tea xinvamnim tancher akromonn kelem ani tanchea soglea haddancho churo korun uddoilo.
25 Uprant, Darius Razan akʼkhea prithumer ravpi soglea lokank, raxttrank, ani veg-veglleo bhaso uloupi zomeank ho sondex boroun dhaddlo: “Tumkam bhorpur xanti asom!
26 Mhojea rajeachea dor eka vattarant ravpi lokamnim Danielachea Devachi bhirant dhorchi, ani taka man diuncho mhunn hanv hukum dita. Karonn toch jivo Dev zaun asa, ani to sodankal jieta. Tachea rajeacho kednanch nas zaunchona, ani tachi razvottki sasnak togta tosli.
27 To vanchoita, salvar korta, toxench mollbar ani prithumer khunna ani vizmitam korta. Karonn tannem xinvanchea chopkeantlo Danielak vattailo.”
28 Tor hea toren, Dariusachea rajeant, ani Persiechea Sirusachea rajeant Danielak ies mellot ravlem.
