Daniel 7:1-28
7 Babilonacho Raza Belshazarachea razvottkechea poilea vorsa, Daniel aplea khatticher nhidlolo astana, tannem ek sopon ani dorxonam polloilim. Uprant tannem tem sopon boroilem, apnnem polloilʼlem tem soglem tannem boroun kaddlem.
2 Danielan mhunnttlem:
“Ratchea vellar hanv dorxonam polloitalom, ani polloi! mollbantlim char vadollam akʼkho doria uchamboll kortalim tem hanvem polloilem.
3 Ani char vhoddlim zonvaram doriantlean bhair ailim, dor ek zonvar dusrea poros vegllem aslem.
4 “Poilem zonvar xinva bhaxen distalem ani taka ghonni bhaxen pakhotte asle. Hanv polloit aslom tednam, tache pakhotte kaddle, taka prithumer thaun voir ubarlem, taka munxa bhaxen don paim-ancher ubem kelem ani taka munxachem kalliz dilem.
5 “Ani polloi! anik ek zonvar. Ek dusrem zonvar, jem eka vanxela sarkem dista tem hanvem polloilem. Tem eke vatten voir sorlolem ani tin bori tachea tonddant, tachea datam modem asleo. Taka oxem sanglolem, ‘Utth ani bhorpur mas kha.’
6 “Uprant hanv polloit ravlom, ani polloi! anik ek zonvar, eka bibttea vaga sarkem. Punn tachea fattir suknnea bhaxen char pakhotte asle. Hea zonvarak char tokleo asleo, ani taka raz cholounk odhikar dilʼlo.
7 “Uprant, ratchea vellar hanv dorxonam polloit ravlom ani hanvem eka chovthea zonvarak polloilem. Tem ekdom bhirankull ani khub xoktivont aslem. Taka vhoddle-vhoddle lokhnnache dant asle. Tem soglem khaun uddoitalem, tacho churo kortalem ani urlolem aplea paim-am ponda maddoitalem. Tem poilinchea soglea zonvaram poros vegllem aslem ani taka dha xingam aslim.
8 Hanv tea xingank polloit aslom tednam, polloi! tanchea modlean ek lhan xing voir sorlem, ani poilinchea xingam modlim tin xingam tachea mukhar umttun kaddlim. Ani polloi! hea xingak munxa bhaxen dolle asle ani ek tondd aslem, jem gorvan uloitalem.*
9 “Hanv polloit aslom tednam xinvasonam manddlim, ani zo Adlea Kalla Voilo Aslo to aplea xinvasonar boslo. Tache kopdde borfa bhaxen dhove ani tachea tokleche kens vula bhaxen nitoll asle. Tachem xinvason ujeachea agtteam sarkem aslem, ani tachea xinvasonachim chakam zollttea ujea sarkim aslim.
10 Tachea mukhar ujeacho ek vhall vhanvtalo. Hozaranche-hozar tachi seva kortale, ani dha hozar pavtti dha hozar tachea mukhar ube asle. Uprant Korttan* apli boska ghetli, ani pustokam ugoddlim.
11 “Tea vellar hanv polloit aslom, karonn tem xing gorvixtt* utram uloitalem. Tea zonvarak jivexim marlem, tachi kudd ujeant uddoun bhosm keli tea meren hanv polloit ravlom.
12 Punn dusrea zonvaram vixim sangchem zalear, tanche koddlean raj choloupacho odhikar kaddun ghetlo, toxench tankam anik thoddea vella pasot ani thoddea kalla pasot jieunk dilem.
13 “Uprant, ratchea vellar hanv dorxonam polloit ravlom, ani polloi! munxachea puta sarko konn tori mollbachea kupam borabor ieta to mhaka dislo. Ani zo Adlea Kalla Voilo Aslo tachea lagim vochonk taka porvangi mellʼlli, ani tannim taka tachea mukhar haddlo.
14 Taka razvottki, man ani raj dilem, jea vorvim sogle lok, raxttram ani veg-veglleo bhaso uloupi zome tachi seva kortole. Tachi razvottki sasnachi razvottki, ti kednanch kabar zaunchina ani tachea rajeacho kednanch nas zaunchona.
15 “Punn hanv, Daniel, bhitorlea-bhitor uskean bhorlom, karonn hanvem polloilʼlim tim dorxonam khub bhirankull aslim.
16 Hea dorxonacho khoro orth kitem tem vicharunk, hanv thoim ube asle tanchea modlea eklea koddem gelom. Tor tannem mhaka zobab diun hea vostuncho orth sanglo.
17 “‘Him vhoddlim zonvaram char raza zaun asat, je prithumer thaun voir sortole.
18 Punn raj, Sogleant Vortea Devachea povitr lokank mellttolem, ani tem raj sodankal, hoi, sodam-sodankal tanchench zaun urtolem.’
19 “Uprant, hanv chovthea zonvara vixim chodd zannam zaunk sodhtalom, jem dusrea zonvaram thaun vegllem aslem. Tem khub bhirankull aslem, taka lokhnnache dant ani tambeachim davlam aslim. Tem soglem khaun uddoitalem, tacho churo kortalem ani urlolem aplea paim-am ponda maddoitalem.
20 Hanv tachea tokle voilea dha xingam vixim, ani uprant voir sorlolea xinga vixim zannam zaunk sodhtalom, jea xinga mukhar tin xingam poddlim, zaka dolle asle, zachem tondd gorvan* uloitalem, ani jem pollounk dusrea xingam poros vhoddlem distalem.
21 “Hanv polloit aslom ki tem xing povitr lokam sangata zhuz kortalem ani tea xingak zoit mellot aslem.
22 Xevottak, zo Adlea Kalla Thaun Aslo to ailo ani tannem Sogleant Vortea Devachea povitr lokanchea vatten neai kelo. Ani povitr lokank raj mellcho tharailʼlo vell pavlo.
23 “Mhaka dorxonacho orth somzaitalo tannem mhaka mhunnttlem: ‘Chovthea zonvara vixim sangchem zalear, tem prithumer ieunchem asa tea chovthea rajeak suchit korta. Tem dusrea rajeam poros vegllem astolem, akʼkhe prithumek khaun uddoitolem, tika paim-am ponda maddoitolem ani ticho churo kortolem.
24 Dha xingam vixim sangchem zalear, tim xingam dha razank suchit kortat jim tea rajea thaun voir sortolim. Ani tea uprant anik ek raza ietolo, zo poilea razam poros vegllo astolo ani to tin razank loz kortolo.
25 To Bhov Vortea add uloitolo, ani to Sogleant Vortea Devachea povitr lokank sotait ravtolo. To kall ani kaido bodolcho proitn kortolo, ani ek kall, don kall ani ordea kalla* pasot povitr lokank tachea hatant ditole.
26 Punn Korttan* boska ghetli, ani tannim tachi razvottki kaddun ghetli. Tem purnn toren kabar zaunchem ani tacho purnn toren nas zauncho mhunn tannim oxem kelem.
27 “‘Ani raj, razvottki ani mollba khala aslolea soglea rajeanchem vorteponn, Sogleant Vortea Devachea povitr lokank dilem. Tanchem raj sasnachem raj astolem, ani sogleo razvottkeo tanchi seva kortoleo ani tanchi adnea pallttoleo.’
28 “Ho vixoi hangach sompta. Ani mhojea vixim sangchem zalear, hanv Daniel, mhojea chintnank lagon khubuch bhielom ani dhovoch* zalom.* Punn hanvem heo sogleo vostu mhojea kallzant dovorleo.”
