Hem Pustok Kiteak Gorjechem

1. Joel pustokant khoinchea disa vixim sanglam, ani tacho orth kitem?

 JOEL pustokant Jehovan aplea ‘disa’ vixim bariksannechi mahiti sanglea. Hea disa vixim sogleamnim ani khas korun tachea sevokamnim zannam zalʼlim taka zai. Bible-ant “Jehovacho dis” him utram, Joel pustokant sogleant poilim uzar keleant oxem dison ieta. Ani Joelan tea vixim panch pavtti sanglam. (1:15; 2:1, 11, 31; 3:14) Bible-ant “Jehovacho dis” mhunnttlear, osle veg-veglle kall zaun asat, jednam Jehovan aplea virodheank xikxa dili ani apunn ekloch khoro Dev mhunn dakhoun dilem.

2. ‘Jehovachea disa’ vixim Joelachi bhasaunni somzonk Bible-antlea her pustokam vorvim amkam koxi modot zata?

² Bible-antlea her pustokamnim mhotvachi mahiti asa jea vorvim ‘Jehovachea disa’ vixim Joelachi bhasaunni somzonk amkam modot zata. ( Boks 29-A polloiat.) Udharonnak, Joelan eka dorxonant tollanchem bhirem polloilem, zannim tanchea mukhar aslolem soglem khaun kabar kelem. Hi bhasaunni 607 K.X.A.-ant, Babilonkaramnim (Kaldeikar) Jeruzalemacho nas kelo tednam purnn zali. Hea nasa vixim Jeremias ani Ezran sanglolem. (Jo 1:6; 2:1, 8-11, 20, 25; 2It 36:17, 19 sor korat; Je 32:43.) Zaitea vorsam uprant, Jehova raxttrancho neai kortolo mhunn Jezun sanglem tednam, tannem Joelan mhunnttlolim toslinch utram uzar kelim. (Jo 2:31; Mt 24:29, 30) Ani 33 K.X.-achea Ponʼnasavea Disa Jezuchea xisancher povitr xokti aili tednam, Joelachea bhasaunnecho thoddo bhag purnn zalo mhunn Pedrun sanglem. (Jo 2:28-32; DI 2:16-21) Tea vellar, Jezuche xis Jeruzalemachea ani tachea mondirachea “xevottachea disamnim” jietale. Ani thoddea vorsam uprant, mhunnttlear 70 K.X.-ant, Jehovan Romi soinikank uzar korun Jeruzalemacho nas kelo. To “Jehovacho dis” aslo. Tea bhair, apostl Pedrun ani Paulun fuddarak ietolea ‘Jehovachea disa’ vixim sanglem, jea vorvim Joelachi bhasaunni fuddarak vhodd promannan purnn zatoli mhunn kolltta.—2Pe 3:12, 13; 1Te 5:2-4.

3. Jehovan khoinchea raxttrank xikxa dili, ani kiteak?

³ Jea raxttramnim Devachea lokank tras kele tanchea pasot “Jehovacho dis lagim pavla” mhunn Joelan sanglem. (3:2-6, 12, 14, 19) Tir, Sidon, Edom, Ejiptt, ani Filistiak Jehova koso xikxa ditolo tea vixim Joelan bhasaunneo keleo. Ani hea raxttram vixim her provadeamnim jeo bhasaunneo keleo teo Joelachea bhasaunneam sarkeoch asleo. Filistia vixim sangtana Amosan tachem mukhel xar Ashdodachem nanv uzar kelem. (Ez 29:14-18; Am 1:8; Mal 1:3, 4 sor korat.) Joelan kelʼleo bhasaunneo khorench purnn zaleo mhunn itihas dakhoun dita. Tor Joelan fuddara vixim jeo bhasaunneo kelʼleo teo pasun ghoddon ietoleo mhunn amcho bhavarth ghott zata.

4. Salvar zaunk ami kitem korunk zai mhunn Joel pustokant sanglam?

⁴ Jehova raxttrancho neai kortolo tednam salvar zaunk ami kitem korunk zai tem Joelan aplea pustokant boroilem. Tem mhunnttlear, “zo konn Jehovachea nanvan ulo marta to salvar zatolo.” (2:31, 32) Uprant, Paulun Joelachea hea utrancho ulʼlekh korun sanglem ki Kristanvamnim salvar zaunk Jehovachea nanvan ulo marunk zai. Ani tannem somzailem ki oxem korunk ek vatt mhunnttlear tannim Jehovacher bhavarth dovrunk zai.—Ro 10:13, 14.

5. Joel pustok amkam Jehova vixim kitem ugddasak haddtta?

⁵ Joel pustok amchea ugddasak haddtta ki Jehova “kakutin bhorlolo, rokddoch ragar zaina toslo ani visvaxi mogan bhorlolo” Dev zaun asa. (Jo 2:13; Su 34:6) Tachea thaun pois gelolea tachea sevokank to mogan porot aplea lagim apoita; tannim aplo sobhav bodolʼlear to tankam bhogxitolo ani besanvam ditolo mhunn sangta. (2:12-14, 21) Punn jim poschatap korinant ani tachea lokam sangata vaitt toren vagtat tankam to xikxa ditolo.—1:15; 3:19.

Pustok Vachʼchea Poilim Hem Zannam Zaiat

6. Joelan khoim ani kednam provadi mhunn seva keli astoli?

⁶ Boroupi: Provadi Joelan aplea pustokant aplea vixim chodd borounk na. Amkam tachem nanv khobor asa, zacho orth, “Jehova Dev Zaun Asa.” Joelan aplea pustokant Juda, Jeruzalem, ani Devmondira vixim boroilem, jea vorvim to Jeruzalemant ravtalo ani tannem Judant bhasaunneo keleo oxem dison ieta. (1:9, 14; 2:17, 32; 3:1, 2, 16-20) Hebrev Bible-ant, Joel pustok Hosea ani Amos pustokanchea modem asa. Tor Joel ghoddie Hosea ani Amos provadi mhunn seva kortale tea vellar, mhunnche K.X.A.-achea nnovea xekddeant seva kortalo. Provadi Amosan ghoddie Joelachea utrancho ulʼlekh kelo. (Jo 3:16; Am 1:1, 2) Amosan aplem pustok sumar 804 K.X.A.-ant boroun sompoilem. Tannem apli bhasaunni borounchea poilim Joelan apli bhasaunni boroili oxem dison ieta. Tor Joelan apli bhasaunni ghoddie sumar 820 K.X.A.-ant boroili. Heo sogleo tarik sarkeo asat zalear, Joel ani Jonas thoddea vella khatir ekach kallar porgottnni kortale oxem mhunnonk zata.

7. Joelan koslo sondex dilo, ani tannem to koxe toren boroilo?

⁷ Pustok boroilʼlem tednam kitem ghoddttalem: 820 K.X.A.-ant, Uzia (Azaria pasun mhunnttla) Judacho raza aslo. Tannem ‘Sorvesporache nodre mukhar borem tem kelem.’ (2It 26:3-14) To raz choloitalo tednam Judachi soin zaitim zhuzam jikhloli ani desant bhorpur jevonn ani poixe asle. Punn zaito lok murti-puza kortalo. (2Ra 15:1-4) Tea vellar Joelan tankam poschatap korunk ani porot Jehovachi bhokti korunk urba dili. Ani ho sondex tankam sarkea vellar mellʼllo. (2:1, 12) Hebrev bhaxent kovita boroitat tea toren Joelan aplo sondex boroilo. Ani tannem oslim utram uzar kelim jea vorvim Jehovachem chintop ani bhavnam spoxtt toren kollon ietat. Mukhel mudʼdeancher dhean haddunk tannem te mudʼde porot-porot sangle. Ani tannem zaitim oslim udharonnam uzar kelim jim ekdom borim ani ugddas dovrunk sompim aslim. Zoxem, tollanchem udharonn. (1:4, 6; 2:7) Joelacho sondex gombhir aslo tem khorem, punn tantuntlean amkam bhuzvonn pasun melltta. Karonn Jehova aplea virodheank xikxa ditolo tednam, apleak visvaxi asat tanchi to rakhonn kortolo mhunn amkam khatri melltta.

Hem Pustok Thoddeach Utramnim

8. Tollanchem bhirem koslem luksonn korta?

 ⁸ Tollanchem bhirem soglem pik khaun kabar korta. (1:1–2:11) Joel ek bhirankull dorxon polloita zantunt tollanchem bhirem desantlem soglem pik khaun kabar korta. Tor kainch jevonn naslolean, Jehovachea mondirant pasun bhettounk kainch asona. Ani lok thoim bolidanam bhettounchim bond kortat. Hea tollank “xoktivont ani mezunk zaina” toslea eka vhodd raxttrak sor kelam. Toxench ‘Jehovachea disa tachem utor purnn kortat’ tosle eke vhodd porjek sor kelam.—1:6; 2:11;  Boks 29-B polloiat.

9. Jehova aplea lokank kitem korunk urba dita?

⁹ Jehova aplea lokank poschatap korunk ani porot aplea lagim ieunk urba dita. (2:12-32) Tannim poschatap kelear to tankam doia-maia dakhoitolo ani odruxtt haddchea vixim porot chintʼtolo mhunn sangta. Toxench to tankam bhogxitolo, besanvam ditolo ani apli povitr xokti ditolo mhunn bhas dita.

10. Aplea lokam sangata vaitt toren vaglolea raxttrank Jehova kitem korta?

¹⁰ Aplea lokam sangata vaitt toren vaglolea raxttrancho Jehova neai korta. (3:1-21) Juda ani Jeruzalemantlean koidi korun vhelʼlea aplea lokank Jehova porot haddttolo mhunn bhas dita. Uprant to raxttrank “Jehoshafatachea Falkeant” ektthaim korta, zoim to tancho neai korta ani tankam xikxa dita. Hea zageak ‘nirnnoi-achem falkem’ oxem-i mhunnttlam. (3:12, 14) Hea pustokachea xevottak “Jehova Sionant ravtolo” mhunn sanglam. (3:21) Hea utrantlean Jehova aplea lokank besanvam ditolo ani tankam rakhtolo mhunn kolltta.