Hem Pustok Kiteak Gorjechem

1. Hosea pustokant amkam Jehovachea khoinchea gunna vixim kolltta, ani hem somzonk tannem koslem udharonn uzar kelam?

 JEHOVA khorench aplea lokancho mog korta toslo Raza zaun asa kai? To aplea sevokanchi porva korta kai? Hoi, hantunt kainch dubhav na! Ani Hosea pustokantlean Jehova amkam hench xikoita. Hantunt amkam Jehovachea eka khas gunna vixim xikonk melltta. To mhunnttlear tachi doia. Eka patki munxan poschatap korun panvlam gheunchea poilinch, Jehova taka bhogsunk toiar asta. Ani hench dakhounk Jehovan Hoseak tachea ovisvaxi bailecho porot mog korunk sanglem. Hea udharonnantlean Jehova kitlo doiall asa tem dison ieta. (3:1) Jehovache lok tachea thaun pois gele, tori astana tannem ‘aple khuxen’ tancho mog kelo mhunn spoxttponnim kolltta.—14:1-4.

2. Hosea pustokant Jehova vixim amkam anik kitem xikonk melltta?

² Hosea pustokant amkam hem-ui xikonk melltta ki Jehova aplea lokank visvaxi asta ani tanchea sangata pasiensan vagta. (2:19, 20) Izraelitkaram zaite pavtti Jehovak soddun khottea devanchi bhokti korunk laglim. Tori astana, Jehovan ‘mogachea doriemnim tankam porot apleaxim voddun haddlim.’ (11:1-4) Punn apunn sodanch pasiens dakhouncho na mhunn Jehovan tankam xittkailim. Ani tim vaitt kamam korit ravlim zalear to tankam xikxa ditolo mhunn sanglem. (10:9-12) Toxench Jehova dhongeponnacho dves korta. Punn konnui sarko hetu dhorun, tem mhunnttlear visvaxi mogak lagon tachi bhokti korta zalear to khuxal zata.—6:4, 6; 10:1, 2.

3. Hosea pustokant ami koslem mhotvachem lisanv xiktat?

³ Hoseachea akʼkhea pustokant Jehova amkam ek mhotvachem lisanv xikoita. Tem mhunnttlear, ami ‘Jehovachea vattamnim’ choltat tednam amchem jivit sodanch borem astolem. (14:9) Izraelitkaramnim a her raxttrancher ani tanchea devancher visvas dovorlo. Oxem kelʼlean tanchem jivit borem astolem mhunn tannim chintlem. (7:11; 9:10; 12:1) Punn him raxttram beginuch tancho ghat korchim aslim ani tanche devui tankam salvar korunk xokche nasle. (8:8, 9; 10:5) Punn Jehovan sodanch aplea lokanchi kallji ghetloli. Toxench, tankam besanvam ditolo mhunn tannem bhas dilʼli.—2:8, 18.

4. Hosea pustokant Kristanvam pasot kosli mhotvachi mahiti asa?

⁴ Hosea pustokantli mahiti Izraelitkarank faideachi asli toxi, Kristanvank pasun mhotvachi asa. Grik Bhaxent Boroilʼlea Pustokamnim, Jezun toxench her apostlamnim, Hosea pustokantlim utram uzar kelim. Toxench, tantuntleo zaiteo bhasaunneo Grik Bhaxent Boroilʼlea Pustokamnim purnn zaleo. ( Boks 28-A polloiat.) Udharonnak, Jehovan Mesiasa vixim oxem bhasailʼlem: “Hanvem mhojea putak Ejiptta thaun apoun haddlo.” (11:1) Hi bhasaunni tednam purnn zali jednam Jezuk Ejipttant vhelo ani Herod melea uprant taka porot Izraelant haddlo. (Mt 2:14, 15) Toxench apostl Paulun somzailem ki Hosea pustokantlea thoddea bhasaunneam pormonnem, Izraelitkar naslole Devache sevok zatole ani tankam “jivea Devache put” mhunnttole. (1:10; 2:23) Hacho orth, te Jezu sangata sorgar raz kortole.—Ro 9:25, 26; 1Pe 2:9, 10 sor korat.

Pustok Vachʼchea Poilim Hem Zannam Zaiat

5. Hosea provadea vixim ami kitem zannant?

⁵ Boroupi: Hosea, hem Hoshaia hea nanvachem short form zaun asa, zacho orth “Jah-n Salvar Kelʼlo; Jah-n Salvar Kelo.” (1:1, ftn.) Jehovan Hoseak khas korun Izraelachea utʼtorechea rajeant provadi mhunn nemlo. Punn tacheo thoddeo bhasaunneo Judachea dokxinnechea rajeant aslolea raxttram pasotui asleo. To ghoddie sumar 804 K.X.A. tem 745 K.X.A. meren provadi mhunn seva kortalo. Tor tannem unneant-unnem 59 vorsam provadi mhunn seva keli. Ani tannem ghoddie 745 K.X.A. tem 740 K.X.A. b modem tachem pustok boroun sompoilem. Hosea provadi mhunn seva kortalo teach vellar, Izraelachea utʼtorechea rajeant Amos ani Oded provadi mhunn seva kortale. Toxench, Judant Izaias ani Mika provadi asle.

6. Hoseachea disamnim Izraelant poristhiti koxi asli?

⁶ Pustok boroilʼlem tednam kitem ghoddttalem: Izraelitkaram Jehovachi seva korinaslim ani thoim zaiteo oddchonneo asleo. Tori astana, Hosean zaitim vorsam visvaxiponnan provadi mhunn seva keli. Tannem aplem kam suru kelem tednam noxtto Raza Jeroboam II, Izraelant raza aslo. Noxtto aslearui to zaitim zhuzam jikhlolo, ani tea pasot Izraelant khub girestkai asli. (2Ra 14:24-28) Punn Izraelitkaram Jehovak samkinch visron gelʼlim. Tim Baalachi bhokti kortat dekhun tanchem jivit borem asa oxem tankam distalem. Baalachi bhokti kortat mhunn dakhounk tim bebdikai kortalim, ani Baalachea mondirant onoitik kamam kortalim. (4:11-13) Jeroboam melea uprant, zaitea zannamnim raza zauncho proitn kelo. Oxem korunk te razank jivexim martale ani apunn raza zatale. Punn uprant konn-na-konn tancho-i jiv kaddttalo. (2Ra 15:8-20) Te raza Ejiptt ani Asirie sangata ixttagot zoddunk sodhtale. Punn tanchea modlea khoincheach razan Jehovacher visvas dovrunk na.

7. Provadi Hosea vorvim Jehovan Izraelitkarank kitem sanglem?

⁷ Hosea vorvim Jehovan Izraela add kes keli. Jehovan Izraelak tim kortat tea patkam vixim, toxench tacho porinnam kitem zatolo tem sanglem. (4:1, 2, 9) Torui, tannem Hoseak uzar korun apunn doia dakhoita ani bhogsunk toiar asa mhunn tanchea ugddasak haddlem. Jehovan Izraela lagim kelʼli hi nimanni vinoti asli. Karonn tea uprant tannem Asiriek Samariecher akromonn korun tacher zoit vhoronk dilem.

8. Hosean aplem pustok koxem boroilem?

⁸ Anik mahiti: Hosean aplea pustokache choddxe bhag kovita bhaxen boroile. Izraelitkaram kortat tim vaitt kamam mhunn sangonk tannem khor utram uzar kelim. Punn tim Jehova lagim porot ieunk tannem doiall utram pasun uzar kelim. (10:1; 14:1, 2) Toxench to sangta tem sor korunk tannem zaitim udharonnam uzar kelim.—4:16; 5:13, 14; 6:3, 4.

Hem Pustok Thoddeach Utramnim

9. Hosea vorvim Jehova aple doie vixim koso somzaita?

⁹ Hosea ani tache ovisvaxi bailechem udharonn uzar korun apunn Izraelitkarank koxi doia dakhoitolo tem Jehova somzaita. (1:1–3:5) Jehova Hoseak ‘osle eke baile lagim kazar zaunk sangta ji uprant xindollki kortoli.’ (1:2) Hosea Gomera lagim kazar zata ani tankam ek put zolmota. Uprant tika anik don bhurgim zolmotat punn tim Hoseachim asonant. c Tea tinui bhurgeanchea nanvanchea ortha thaun kollon ieta ki Jehova Izraelacho neai kortolo ani tankam nakartolo. Odheai 2-ant, Jehova sangta ki Izraelak xikxa dilea uprant to tankam doia dakhoun bhogxitolo ani porot aplea lagim ieunk modot kortolo. Jehova Hoseak tachea ovisvaxi bailek porot apnnaunk sangta. Hea vorvim to Izraelak bhogsunk kitlo toiar asa tem to dakhoun dita.—3:1.

10-11. Izraelitkaramnim Jehovak koso dukhoilo?

¹⁰ Apunn Izraelitkarank xikxa ditolo mhunn Jehova bhasaita. (4:1–13:16) Izraelitkarancher ragar zaunk Jehovak zaitim karonnam asat mhunn Hosea tankam sangta. (4:1, 2) Toxench Judachea lokanchea vaitt kamam vixim pasun to sangta. (5:5) Ani Jehova lagim porot ieunk tankam urba dita. (6:1) Punn tachem aikonchea bodlek Izraelitkaram dusrea raxttram lagim modot magtat. (7:11) Taka lagon tankam tras bhogche poddttole. (8:7-10) Ani Jehova Izrael raxttrak nakarcho ani tankam xikxa diuncho aslo.—9:17; 10:15.

¹¹ Apnnem Izraelitkarancho sodanch mog kelo mhunn Jehovan tanchea ugddasak haddlem. (11:1-3) Punn tannim tacho mog korunk na. (11:7; 12:1) Tim porot-porot Jehovachea add gelim dekhun tanchi rajdhani Samariecho nas zauncho aslo.—13:16.

12. Izraelitkaram porot Jehova lagim ailear tankam koso faido zatolo aslo?

¹² Izraelitkaramnim porot aplea lagim ieunk Jehovachi nimanni vinoti. (14:1-9) Jehova aplea lokank porot aplea lagim ieunk urba dita. Tannim oxem kelear to tankam doia dakhoun bhogxitolo ani porot tancho mog kortolo mhunn bhas dita.