Vilap 4:1-22
א [Aleph]
4 Jem bhangar eka vellar xudʼdh aslem ani chokchoktalem, tacho porzoll atam koso na zaun gela tem polloi!
Povitr fator dor eka rosteachea konnxeak koxe ximpoddleat tem polloi!
ב [Beth]
2 Sionache manadik put, je eka vellar xudʼdh bhangra bhaxen moladik asle,Te atam koxe kumbharachea hatamnim kelʼlea matiechea moddke sarke zaleat, tem polloi!
ג [Gimel]
3 Koli* pasun aplea porank dudh dita,Punn mhojea lokanchi dhuv ranvott vattarantlea xohamrugam* bhaxen krur zalea.
ד [Daleth]
4 Dudh pietolea ballkachi jib tanen talliek chittkolea.
Bhurgim unddo magtat, punn konn tankam tacho kuddko pasun dina.
ה [He]
5 Je eka vellar borem-borem jevonn jevtale, te atam rosteancher upaxim poddlole asat.
Je lhanponnim thaun mharog* kopdde ghaltale, te atam gobrachea raxicher lollttat.
ו [Waw]
6 Mhojea lokanchea dhuvechi khast* Sodomachea patkachea khasti poros chodd asa,Zaka ekach khinna bhitor uddoilʼlem ani tachi modot korunk konnuch naslo.
ז [Zayin]
7 Tiche Nazirit* borfa poros nitoll ani dudha poros dhove asle.
Te doriantlea moladik fatram poros chodd tambdde asle, ani safair fatram* bhaxen chokchoktale.
ח [Heth]
8 Punn atam te kazolla* poros chodd kalle zaleat,Rosteancher te vollkhonk pasun ienant.
Tanchi kat mirio poddon haddank chittkolea, ti lakdda bhaxen suklea.
ט [Teth]
9 Tolvarin meleat te, bhuken meleat tanchea poros chodd bore,Konnem tori tankam tolvar toplolea bhaxen, te xetantlem pik mellona zaun tollmollon oskot zait voitat.
י [Yod]
10 Doia-maia aslolea bailamnim apleach hatamnim aplea bhurgeank xizoilim.
Mhojea lokanchi dhuv poddli tednam tanchim bhurgim tanchea dukhachem jevonn zalim.
כ [Kaph]
11 Jehovan aplo rag dakhoila,Tannem aplea ragacho uzo votoila.
Tannem Sionant oso uzo pettoila, zo tachea buniadicho bhosm korun uddoita.
ל [Lamed]
12 Jeruzalemacho nas korpi ani tacho dusman, tachea darvontteantlean bhitor sortolo mhunnPrithumechea razamnim ani tantunt ravtoleamnim visvas dovrunk na.
מ [Mem]
13 Hem soglem tachea provadeanchea patkank lagon ani iadnikanchea guneanvank lagon ghoddlem,Zannim tachea modem aslolea nitivont munxanchem rogot varoilem.
נ [Nun]
14 Te kuddʼddeam bhaxen rosteancher bhonvtat.
Te rogtan oxudʼdh zaleat,Zaka lagon, konnuch tanchea kopddeank hat lavunk xokona.
ס [Samekh]
15 Lok tankam vhoddlean bob marun mhunnttat, “Pois vochat! Oxudʼdh asloleamno. Pois vochat! Pois vochat! Amkam hat lainakat!”
Karonn te provadi ani iadnik ghor-dar naslole zaleat ani hanga-thoim bhottoktat.
Raxttrantle lok mhunnttat: “Te hanga amchea sangata* ravonk xokonant.
פ [Pe]
16 Jehovan svota tankam hanga-thoim ximpddaileat,To tankam anik kednanch maniotai diunchona.
Lok porot kednanch iadnikank man diunchenant, vhoddilank doia dakhounchenant.”
ע [Ayin]
17 Modoti pasot ami bexttech vatt polloit ravle ani amche dolle thokle.
Ami modoti pasot oslea eka raxttra koddem polloit ravle, jem amkam salvar korunk xoklem na.
צ [Tsade]
18 Ami dor ek panvl martana tannim amcho xikar kelo, dekhun nakeancher poriant amkam cholonk mellonaslem.
Amcho xevott lagim pavla. Amche dis somple, karonn amcho xevott aila.
ק [Qoph]
19 Amchea fattik laglole te, mollba voilea ghonni poros fastt asle.
Te porvotancher amchea fattik lagle ani amkam dhorunk ranvott vattarant lipon bosle.
ר [Resh]
20 Amchea jivitacho svas ani Jehovacho makhlolo, zachea vixim ami mhunnttale: “Tachea savllek ami raxttram modem ravtole,”To tanchea vhoddlea fonddant sampoddla.
ש [Sin]
21 Uz desant ravpi Edomache dhuve, sontosbhorit zaun khuxalkai monoi.
Punn tujea hatant pasun to pelo ietolo, tum taitt zatolem ani aplem vingllemponn dakhoitolem.
ת [Taw]
22 Sionache dhuve, tujea guneanvachi khast kabar zaunchi asa.
To tuka porot koident vhorchona.
Punn Edomache dhuve, atam to tujea guneanvacher dhean ditolo.
Tujim patkam uktim korun dakhoitolo.
Footnotes
^ Vo “Kolsunnem.” Inglez bhaxent “jackal.”
^ Inglez bhaxent taka “ostrich” mhunnttat.
^ Utran utor, “tambddech.”
^ Utran utor, “guneanv.”
^ Xobdhkox polloi.
^ Bible-ant sanglole safair fator ghoddie nillea mannkank suchit kortat.
^ Utran utor, “kallea ronga.”
^ Vo “hanga pordexiam bhaxen.”
