Zonasi 4:1-11
4 Sanngɛ i sɔ’n w’a yoman Zonasi i fɛ kaan sa. Ɔ maan ɔ fali ya dan kpa.
2 Ɔ srɛli Zoova. Ɔ seli kɛ: “?Ee, Zoova, nán ndɛ nga kɛ n o min klɔ lɔ’n n kannin’n yɛ ɔ o lɛ-ɔ? I kwlaa sɔ’n ti yɛ i klikli’n nun’n, n waan ń kɔ́ Taasisi’n niɔn.+ Afin n si kɛ a ti Ɲanmiɛn kun m’ɔ si aunnvɔɛ-ɔ, a yaci sa cɛ, a faman ya ndɛndɛ, a klo sran dan,+ yɛ kɛ ɲrɛnnɛn tɔ sran su’n, ɔ yoman ɔ fɛ.
3 Ɔ maan Zoova, kpɛ i kpo kun min. Afin sɛ n wu’n ɔ flunman tra kɛ n ka nguan nun.”+
4 Zoova usɛli i kɛ: “?Ya dan nga w’a fɛ i lɛ’n ɔ ti su?”
5 Zonasi fin klɔ’n nun fiteli. Ɔ ko trannin klɔ’n i wia afiliɛ lɔ. Ɔ kplannin kpata kun lɛ, ɔ trɛnnin i fɔnvɔ’n i bo naan ɔ́ nían sa ng’ɔ́ wá jú klɔ’n su’n.+
6 Ɲanmiɛn Zoova yoli maan ɲanman kun m’ɔ ti kɛ towa ɲanman* sa’n, ɔ fifili, yɛ ɔ buali Zonasi i ti su nglo. Ɔ yoli sɔ naan wia’n w’a boman Zonasi i ti’n su, naan i wla gua ase. Zonasi i klun jɔli kpa ɲanman sɔ’n ti.
7 Kɛ i aliɛ cɛnnin mɔ lika’n titili’n, Ɲanmiɛn Kpli yoli maan kakaa kun wa sannin ɲanman’n, ɔ maan ɔ wuli kee.
8 Kɛ wia’n bó’n, Ɲanmiɛn yoli maan aunmuan kun m’ɔ fin wia afiliɛ lɔ’n fitali. Aunmuan sɔ’n lo kpa. Wia’n boli Zonasi i ti’n su dan, ɔ maan ɔ wunmɛn i wun fɛ kaan sa. I sɔ’n ti’n, ɔ sun flɛli wie’n. I waan: “Sɛ n wu’n, ɔ flunman tra kɛ n ka nguan nun.”+
9 Ɲanmiɛn usɛli i kɛ: “?Kɛ a niɛn i sa’n, ɲanman’n i ti ya dan nga w’a fɛ i lɛ’n ɔ ti su?”+
Ɔ tɛli su kɛ: “Sɛ n fa ya’n ɔ ti su. I kpa bɔbɔ’n, m’an fa ya dan ti’n, n kunndɛ kɛ ń wú.”
10 Sanngɛ Zoova seli i kɛ: “A koko ɲanman’n i ti, kusu nn w’a dimɛn i wun junman, yɛ nán wɔ yɛ a yoli maan ɔ fifili-ɔ. Ɔ fifili kɔnguɛ kun nun, yɛ ɔ wuli kɔnguɛ kun nun.
11 ?Yɛ min li, ɔ fataman kɛ n si Ninivu m’ɔ ti klɔ dan’n+ nin i nun sran akpiakpi ya akpiakpi ablaɔn (120.000) mɔ be siman sa kpa’n nin sa tɛ’n* be ngbaciɛ’n, ɔ nin be nnɛn kpanngban’m be aunnvɔɛ?”+
