Ben-adad, Kabaka me Ciria onongo tiko lweny i kom jo Icrael. Ento lanebi Elica obedo ka ciko kabaka me Icrael ni ogwokke, pi meno en obwot. Dong, Ben-adad omoko tamme me mako Elica. En oniang ni Elica tye i boma me Dotan, ci ocwalo mony me Ciria ka make.

Jo Ciria gubino i Dotan i dyewor. Odiko con, latic pa Elica okato woko ci oneno ni mony madit orumo gang woko ducu. Lworo omake matek ci odange ni: ‘Elica, man wabitimo ngo?’ Elica owacce ni: ‘Jo ma tye tung botwa dwong makato jo ma tye tung botgi.’ Cutcut, Jehovah oyabo wang latic pa Elica omiyo en oneno aguragura ki gadigadi lweny me mac opongo wi got woko.

Ka lumony me Ciria gutemo mako Elica, en olego ni: ‘Jehovah, alegi ni iwek wang jo magi oto woko.’ Kadi bed onongo wang lumony magi pud neno piny, ento Jehovah onyweno wigi woko omiyo pe guniang ka ma gitye iye.  Elica owaco botgi ni: ‘Wurwenyo woko do. Wulub kora, abiterowu bot dano ma wuyenyo-ni.’ Gulubo kor Elica wa i Camaria, ka ma kabaka me Icrael bedo iye.

Jo Ciria guniang dong lacen ka ma gitye iye. Kabaka me Icrael openyo Elica ni: ‘Anekgi woko?’ Elica tika otiyo ki kare man me culo kwor i kom jo ma onongo gutemo wanne? Pe. Elica owaco ni: ‘Pe inekgi. Ket cam ki pii i nyimgi, wek gucam, gumati, ka dong iwek gudok cen.’ Pi meno kabaka oyubo cam madwong pigi, gucamo, ka dong gudok cen i pacogi.