Cit atir i jami ma tye

Cit atir ka ma nyuto lok ma tye iye

 PWONY ME 28

Kana pa Balaam Oloko Balaam

Kana pa Balaam Oloko Balaam

Jo Icrael onongo dong gubedo i dye tim pi mwaki ma romo 40 kulu. Onongo dong guturo boma mogo matego. Ento kombeddi, onongo gutongo gony cok ki lobo Moab, tung kunyango me Kulu Jordan. Balak, kabaka me Moab onongo lworo ni jo Icrael gubimayo lobone woko. Pi meno, en olwongo laco mo ma nyinge Balaam me bino i Moab wek ocen jo Icrael.

Ento Jehovah owaco bot Balaam ni: ‘Omyero pe icen jo Icrael.’ Pi meno, Balaam okwero cito woko. Kabaka Balak dok olwonge pi tyen me aryo ci ocikke me miyo bot Balaam gin mo keken ma iye mito. Ento, Balaam pud okwero cito. Ci Lubanga owacce ni: ‘Iromo cito kwedgi, ento gin ma aciko boti keken aye ibiwacone.’

Balaam ocako wot ki kanane kun ciko tung kupiny. En onongo mito ceno jo Icrael kadi bed Jehovah ocike ni pe ocengi. Lamalaika pa Jehovah otuc i dye gudo tyen adek kulu. Balaam onongo pe twero neno lamalaika-ni, ento kana pa Balaam onongo twero nene. I acakkine, kana-ni oa woko ki i gudo, ocito i poto. I ngeye, kana pa Balaam oyokke ki cel got, ci odiyo tyen Balaam i kom cel. Lacen, kana-ni obuto woko piny i wangayo. Kare ducu, Balaam obedo ka goyo kanane ki odoo.

I kare ma Balaam ogoyo kana pi tyen me adekke, Jehovah omiyo kana oloko. Kana openyo Balaam ni: ‘Pingo ibedo ka goya?’ Balaam owacci: ‘Pien imiyo adoko calo laming. Ka onongo atye ki pala i cinga, kono aneki woko.’ Kana ogamo ni: ‘An a kanani ma ibedo i koma dong pi mwaki mapol. Onongo yam atimme kit man i komi?’

I nge man, Jehovah omiyo Balaam oneno malaika. Malaika owaco ni: ‘Jehovah ociki ni pe icen jo Icrael.’ Balaam ogamo ni: ‘Atimo gin marac. Abidok cen gang.’ Ento malaika owacce ni:  ‘Itwero cito i Moab, ento gin ma Jehovah ocikki keken aye ibiloko.’

Man tika opwonyo wi Balaam? Pe. I nge meno, Balaam otemo ceno jo Icrael tyen adek, ento Jehovah omiyo en olamo gum aye. Lacen, jo Icrael gulwenyo i kom jo Moab, kineko Balaam woko. Ka onongo Balaam owinyo dog Jehovah, kono jamine owoto maber, pe kumeno?

“Wugwokke i paro lim; pien kwo pa dano pe cung i wel lim mapol ma en tye kwede.”​—Luka 12:15