Cit atir i jami ma tye

Cit atir ka ma nyuto lok ma tye iye

 PWONY ME 76

Yecu Olonyo Ot pa Lubanga

Yecu Olonyo Ot pa Lubanga

I dwe me April i mwaka 30 K.M., Yecu ocito i Jerucalem. Dano mapol onongo gubino i boma man pi kwer me Kato. I kwer man, dano onongo gityero lee macalo mot i ot pa Lubanga. Jo mogo gubino ki leeyigi, ento jo mukene guwilo lee ki i Jerucalem.

I kare ma Yecu odonyo i ot pa Lubanga, en oneno dano ma gitye ka cato lee kunnu. Gubedo ka tiyo cente pigi kengi i ot me woro Jehovah! Yecu odok iye nining? En okedo tol ci oryemo romi ki dyangi woko ki i ot pa Lubanga. Oreto meja pa lulok-cente ci oonyo nyig centegi woko piny. Yecu owaco bot jo ma gitye ka  cato amam ni: ‘Teru jami magi woko ki kany! Pe wulok ot pa Abana odok kabedo me tiyo biacara!’

Dano ma i ot pa Lubanga gubedo ki ur i kom gin ma Yecu otimo. Lulub kore wigi opo i kom lok ma lanebi mo ocoyo i kom Meciya ni: ‘Mit kom pi ot pa Jehovah mito neka woko.’

Lacen i mwaka 33 K.M., Yecu dok olonyo ot pa Lubanga tyen me aryone. En pe oye ni ngat mo onyut cac i kom ot pa Wonne.

“Pe itwero tic pi Lubanga ka dok pi lim bene.”​—Luka 16:13