Cit atir i jami ma tye

Cit atir ka ma nyuto lok ma tye iye

 PWONY ME 85

Yecu Ocango Dano i Cabat

Yecu Ocango Dano i Cabat

Luparicayo onongo gidag Yecu mada dok gimito nongo lok i kome wek kitweye i mabuc. Gin guwaco bot Yecu ni pe myero ocang lutwo i Cabat. I Cabat mo acel, Yecu onongo latowang mo ka lego lim i yo. Yecu owaco bot lupwonnyene ni: ‘Nen kit ma teko pa Lubanga bikonyo kwede laco-ni.’ Yecu orubo laane ki ngom ci owiro ki wang laco-ni. Yecu owaco bote ni: ‘Cit ilwok wangi i kut me Ciloam.’ Laco-ni otimo man, ci dong pi tyen mukwongo i kwone, en oneno piny.

Lok man obalo wi dano ma pe wacce. Gin guwaco ni: ‘Man mono pe laco ma onongo bedo kun kwayo lim-mi, nyo kece cal kwede acala?’ Laco-ni owaco ni: ‘An aye dano ma kinywale ma wange oto-ni!’ Dano gupenye ni: ‘Wangi oyabbe nining?’ I kare ma en otito botgi gin mutimme, gutere bot Luparicayo.

Laco-ni owaco bot Luparicayo ni: ‘Yecu aye orubo laane ki ngom, owiro i wanga ci ocika ni acit alwok woko. Atimo kumeno, ci acako neno piny.’ Luparicayo guwaco ni: ‘Ka Yecu cango dano i Cabat, ma nyutti tekone pe a ki bot Lubanga.’ Ento jo mukene guwaco ni: ‘Ka tekone pe a ki bot Lubanga, kono pe obedo ki kero me tiyo lanyut man.’

Luparicayo gulwongo lunyodo pa laco-ni ci  gupenyogi ni: “Gin ango ma omiyo dong en neno piny?” Lunyodone onongo gilwor pien Luparicayo con guwaco ni ngat mo ma oketo niye i kom Yecu kibiryeme woko ki i kacokke. Pi meno gin guwaco ni: ‘Wan pe wangeyo. Wupenye.’ Luparicayo gumedde ki penyo laco-ni nio ka en owaco ni: ‘An dong atyeko tittiwu jami ducu. Pingo pud dok wupenya?’ Luparicayo gukeco adada ci guryeme woko.

Yecu ocito ka yenyo laco-ni wang ma ononge, ci openye ni: ‘In itye ki niye i kom Meciya?’ Laco-ni ogamo ni: ‘Kono onongo angeye kono aketo niye i kome.’ Yecu owaco ni: ‘An aye Meciya.’ Yecu onyuto cwiny me kica, pe kumeno? En pe ocango laco-ni keken ento bene okonye me bedo ki niye.

“Wun wurwenyo, pien pe wungeyo gin ma gicoyo i ginacoya, kadi wa teko pa Lubanga bene wukwiya.”​—Matayo 22:29