Cit atir i jami ma tye

Cit atir ka ma nyuto lok ma tye iye

 PWONY ME 66

Ejira Opwonyo Cik pa Lubanga

Ejira Opwonyo Cik pa Lubanga

Cokcok mwaka 70 onongo dong okato cakke ma Luicrael mukwongo gudok cen i Jerucalem, ento Luicrael mapol onongo pud gibedo i but Ker me Percia mapatpat. Ngat acel i kingi obedo lalamdog ma nyinge Ejira, ma onongo pwonyo cik pa Jehovah. Ejira oniang ni jo ma i Jerucalem pe gitye ka lubo Cik, dok en onongo mito cito kunnu ka konyogi. Kabaka me Percia ma nyinge Kabaka Aritakcec owaco bote ni: ‘Lubanga omini ryeko me pwonyo Cikke. Citi, dok iter ngat mo keken ma mito wot kacel kwedi.’ Ejira olwongo jo ducu ma gimito dok cen i Jerucalem i cokke. Gin gulego bot Jehovah ni ogwokgi i wot mabor man, ci gucako wot.

I nge dwe angwen, gin guo i Jerucalem. Ludito ma kunnu guwaco bot Ejira ni: ‘Jo Icrael guturo cik pa Jehovah ci gunyomo mon ma giworo lubange me goba.’ Ngo ma Ejira otimo? I nyim jo ducu, Ejira orumo conge piny ci olego ni: ‘Jehovah, in itimo jami mabeco mapol piwa, ento wan watimo bal madit i komi.’ Dano gungut i kom balgi ento pud gumedde ki timo jami ma pe tye atir. Ejira oyero ludito ki lungolkop me neno lok man. Pi dwe adek ma lubo-ni, gubedo ka ryemo jo ma pe giworo Jehovah woko.

Mwaka apar wiye aryo okato. I kare meno, kigero cel me Jerucalem kityeko woko. Pi meno Ejira ocoko dano ducu i dye kal ma i nyim dogcel ci okwano botgi Cik pa Lubanga. I kare ma Ejira oyabo buk, dano ducu gua malo gucung. En opako Jehovah, ci lwak gutingo cinggi malo me ye lokke. I ngeye, Ejira okwano lok ma i buk me Cik kun gonyo tere, dok dano guciko itgi ka winyo lokke. Guye ni gin dok gutimo bal i kom Jehovah, ci gukok matek. I nino ma lubo meno, Ejira dok omedde ki kwano Cik botgi. Gupwonyo ni omyero gukwer Nino Madito me Bolo. Cutcut, gucako yubbe pi kwer man.

Pi nino abiro me kwer man, dano gubedo ki yomcwiny madit tutwal kun gipwoyo Jehovah pi kac mabup. Cakke  i kare pa Yocwa jo Icrael onongo peya gukwero Nino Madito me Bolo kit ma gukwero kwede i nino meno. I nge kwer man, dano gucokke ci gulego kacel ni: ‘Jehovah, in ilarowa ki i opii, ipitowa i kare ma watye i dye tim, dok imiyowa lobo man maleng-ngi. Ento wan waturo cikki tyen mapol. In ioro lunebi me cikowa, ento pe wawinyo lokgi. Kadi bed kit meno, in idiyo cwinyi i komwa. Igwoko cikkeni bot Abraim. Man dong wacikke ni wabibedo luwiny.’ Gucoyo cikkegi piny i buk ci rwodi, Lulevi, ki lulamdog guketo cinggi iye me mokone.

‘Gitye ki yomcwiny, jo ma giwinyo lok pa Lubanga, dok gigwoko!’ ​—Luka 11:28