Cit atir i jami ma tye

Cit atir ka ma nyuto lok ma tye iye

 PWONY ME 47

Jehovah Ojingo Cwiny Elia

Jehovah Ojingo Cwiny Elia

Jejebel owinyo gin mutimme i kom lunebi pa Baal, ci kiniga omake matek adada. En ocwalo kwena bot Elia ni: ‘Diki abineki woko calo lunebi pa Baal ma inekogi-ni.’ Lworo omako Elia matek ci en oringo woko i dye tim. Olego ni: ‘Jehovah, dong oroma. Wek ato woko.’ Pi olo madwong, Elia obuto i te yat onino woko.

Lamalaika mo ocoye ki i wang nino ci oloko kwede ki mwolo ni: ‘A malo wek icam.’ Elia oneno capat ma gitedo i kom got malyet ki abino me pii. En ocamo, omato pii ka dok obuto piny onino. Lamalaika dok ocoye ci owacce ni: ‘Cam gin mo. Myero inong teko me medde ki wotti.’ Elia dok ocamo. I nge meno en owoto pi nino 40 dyeceng ki dyewor, wang ma oo i Got Koreb. Ka Elia oo kunnu, odonyo i boro mo ka nino. Ento Jehovah oloko kwede. En owacci: ‘Itimo gin ango kany, Elia?’ Elia ogamo ni: ‘Jo Icrael guturo gicikegi boti woko. Gumuko keno tyerri dok guneko lunebini woko. Man dong gimito neka bene.’

Jehovah owacce ni: ‘Wot icung i wi got.’ Me acel, yamo mo magwar okodo kun kato i dog boro. I nge meno, oyengyeng obino ka dong mac. I agikkine, Elia owinyo dwan mo matidi. En oumo wange ki bongone ci ocito ocung woko i dog boro. Jehovah openye pingo en ongweco woko. Elia ogamo ni: ‘An adong kena.’ Ento Jehovah owacce ni: ‘Pe idong keni. Tye dano 7,000 kulu i Icrael ma pud giwora. Cit iwir Elica me doko lanebi ma bileyo kakari.’ Cutcut, Elia ocito ka timo gin ma Jehovah owacce ni otim. In itamo ni Jehovah bikonyi bene ka itimo gin ma en mito? Ada, en bikonyi. Kong dong wanenu gin mo mutimme i kare ma kot pe obedo ka cwer ca.

“Pe wubed ki par i kom gin mo, ento i lok ducu wumi Lubanga onge gin ma wumito i lega ki i bako dogwu kacel ki miyo pwoc bene.”​—Jo Pilipi 4:6