Cit atir i jami ma tye

Cit atir ka ma nyuto lok ma tye iye

 PWONY ME 78

Yecu Otito Kwena me Ker pa Lubanga

Yecu Otito Kwena me Ker pa Lubanga

Cutcut i nge batijane, Yecu ocako tito kwena ni: ‘Ker pa Lubanga dong onyiko cok.’ Lupwonnyene gulubo kore ma en cito ka tito kwena i Galilaya ki Judaya. I kare ma Yecu odok cen paco i boma me Najaret, en odonyo i kacokke pa Lujudaya, oyabo buk adola pa Icaya, ci okwano ki dwan malongo ni: ‘Jehovah omiya cwiny maleng wek atit lok me kwena maber.’ Meno tyen lokke ngo? Te lokke ni kadi bed dano onongo gimito neno ka Yecu timo tango, gin ma pire tek mumiyo en onongo cwiny maleng obedo pi tito lok me kwena maber. Dong en owaco bot jo ma winyo lokke ni: ‘Tin lok pa lanebi man ocobbe kakare.’

I nge meno, Yecu ocito i Nam me Galilaya, ka ma en orwatte ki lupwonnyene angwen, ma gubedo lumak rec. En okwayogi ni: ‘Wubin wulub kora, ci an abimiyo wudoko lumak dano.’ Gin aye Petero, Anderiya, Yakobo, ki Jon. Cutcut gin guweko ticgi me mako rec ci gulubo kore. Guwoto ka weng i lobo Galilaya, kun gitito kwena me Ker pa Jehovah. Gutito kwena i kacokke, i cuk, ki i teng gudo. Lwak dano mapol gulubo korgi ka mo keken ma onongo gicito iye. Lok i kom Yecu oo i kabedo ducu, kadi wa i lobo Ciria.

I nge kare mo, Yecu omiyo bot lulub kore mogo teko me cango dano ki me ryemo cen maraco. Jo mukene guwoto kacel kwede ka en tito kwena i kin boma ki caro mapatpat. Mon mogo ma lugen, ma i kine tye iye Maliam Lamagdala, Joana, Cucana, ki mukene gubedo ka konyo Yecu ki lulub kore.

I nge pwonyo lulub kore, Yecu ocwalogi woko ka tito kwena. Gubedo ka wot i kabedo ducu me Galilaya dok jo mapol gudoko lulub kor Yecu ci gunongo batija. Jo mapol onongo gimito doko lulub kor Yecu mumiyo Yecu oporogi ki poto ma camme ocek ma mito akaya. En owacci: ‘Wuleg bot Jehovah wek ocwal lutic mukene ka kac.’ Lacen en oyero jo 70 ki i kin lulub kore ci  ocwalogi woko ki aryo aryo wek gutit kwena i Judaya. Gin gupwonyo dano ducu lok i kom Ker-ri. I kare ma jo-ni gudwogo cen, onongo gitye ki miti madit me tito bot Yecu gin mutimme. Pe tye gin mo ma Catan onongo twero timo me juko tic me tito kwena.

Yecu oketo tek me neno ni lulub kore gumedde ki timo tic ma pire tek-ki kadi ka en odok i polo. En owaco botgi ni: ‘Wutit kwena maber i wi lobo ducu. Wupwony dano ki Lok pa Lubanga, dok wubatijagi.’

“Myero atit lok me kwena maber me ker pa Lubanga i gang mukene bene, pien giora pi lok man.”​—Luka 4:43