Cit atir i jami ma tye

Cit atir ka ma nyuto lok ma tye iye

 PWONY ME 21

Pwod me Apar

Pwod me Apar

Moses ocikke bot Parao ni pe dok ebidok ka nene. Ento ma peya oa, en owaco bot Parao ni: ‘I cwiny dyewor, lutino kayo ducu ma i Ejipt, cakke ki i kom wod pa Parao nio kwede i kom awobe pa opii gibito woko.’

Jehovah owaco ni jo Icrael myero gucam cam mo ma kite dok pat. En owaco ni: ‘Wunek nyok romo nyo dyel ma tye ki mwaka acel, ci wucwiny remone manok i kom okar me doggolawu. Wubul ringone, ci wucam ki mugati ma tobi pe iye. Wurukke maber ki war i tyenwu kun nongo wutye atera me a woko. I dyewor man abigonyowu woko.’ Tika Itwero goyo yomcwiny ma jo Icrael gubedo kwede?

I cwiny dyewor, lamalaika pa Jehovah owoto i odi ducu ma tye i Ejipt. I odi ma pe kicwinyo remo i kom okar me doggolane, latin kayo oto iye. Ento lamalaika okato i wi odi ma kicwinyo remo i komgi. Jo me odi ducu me lobo Ejipt, kadi bed gulony nyo gilucan, gurwenyo latin mo. Ento kadi wa latin acel pa jo Icrael pe oto.

Wod pa Parao kikome bene oto woko. Parao onongo dong pe twero kanyone. Cutcut en owaco bot Moses  ki Aron ni: ‘Wua, wucit woko ki kany. Wuciti wuwor Lubangawu. Wua woko ki leewu!’

Ma dwe tye ka ryeny matar, jo Icrael gua woko ki i Ejipt ma guyubbe i dog ot ki dog ot, ki kaka ki kaka. Onongo tye co 600,000 kacel ki mon ki lutino mapol adada. Ki bene, lwagi jo mukene bene gucito kwedgi wek giwor Jehovah bene. Jo Icrael onongo dong gitye agonya!

Me po i kom kit ma Jehovah olarogi kwede, onongo gicamo cam meno mwaka ki mwaka. Onongo kilwongo ni kwer me Kato.

“Aweki makwo pi tyen lok man: wek omi anyut tekona i komi, wek nyinga oywek i wi lobo ducu.”​—Jo Roma 9:17, NW