Cit atir i jami ma tye

Cit atir ka ma nyuto lok ma tye iye

 PWONY ME 25

Kema me Woro

Kema me Woro

I kare ma Moses onongo tye i Wi Got Cinai, Jehovah owacce ni oyub kema mo ma kite dok pat, ka ma jo Icrael twero Wore iye. Onongo gibitingo kema-ni ka weng ma giwoto iye.

Jehovah owaco ni: ‘Wac bot jo Icrael ni gumi gin ma gitwero miyone pi konyo yubo kema me woro.’ Jo Icrael gumiyo jabu, ryal, mola, kidi me wel, ki gin it-gu. Gin bene gumiyo yer romo, bongo camanini, laa dyegi, ki jami mukene mapol ata. Cinggi obedo yot mada mumiyo Moses owaco botgi ni: ‘Watye ki muromo! Pe dong wumedde ki kelo gin mo.’

Co ki mon mapol ma ludiro gumiyo kony i yubo kema me woro. Jehovah ominigi kwiri me tic. Mogo gubedo ka wiyo uci nyo kwoyo kwoc. Mukene gumwono kidi, guteto jabu, nyo gupayo bao.

Dano guyubo kema-ni kit ma Jehovah otittigi kikome. Gukwoyo bongo mo ma mwonya adada me poko i kema-ni i bute aryo, Kabedo Maleng ki dong Kabedo Maleng Makato Ducu. I Kabedo Maleng Makato Ducu, onongo tye canduk me gicikke, ma kiyubo ki bao yat okuto ki jabu. I Kabedo Maleng, onongo tye meja, okar mac ma kiyubo ki jabu, ki dong keno tyer me wango odok eceta. I dyekal me kema onongo tye otako mola ki keno tyer madit. Canduk me gicikke onongo poyo wi jo Icrael i kom cikkegi me winyo dog Jehovah. In tika ingeyo ngo ma gicikke  obedo? Obedo cikke mo ma kite dok pat.

Jehovah oyero Aron ki awobene me tic i kema me woro macalo lulamdog. Ticgi onongo kwako gwoko kema-ni ki tyero gityer bot Jehovah. Lalamdog Madit, Aron, keken aye kiye ni odony i Kabedo Maleng Makato Ducu. Mwaka ki mwaka, en onongo donyo iye kicel keken me tyero tyer pi balle, bal pa jo me ode, ki dong bal pa rok ducu me Icrael.

Jo Icrael gutyeko yubo kema man i nge mwaka acel ma gua kwede ki i Ejipt. Onongo dong gitye ki kabedo me woro Jehovah.

Jehovah opongo kema me woro ki deyone ci pol ocako nen i wiye. Ka tekke pol-li onongo tye i wi kema me woro, jo Icrael gibedo mot. Ento ka pol ocako warre woko, gin guniang ni cawa dong oromo me medde ki wot. Onongo gitingo jami ma i kema-ni ci gilubo pol.

“Ci awinyo dwan mo malongo ma oa ki i komker kun wacci, ‘Nen, kabedo pa Lubanga dong tye bot dano. En bibedo kacel kwedgi, ci gin gibibedo jone. Lubanga kikome aye bibedo kwedgi, kun bene bedo Lubangagi.’”​—Niyabo 21:3