Cit atir i jami ma tye

Cit atir ka ma nyuto lok ma tye iye

 PWONY ME 70

Lumalaika Gutito pi Nywalo Yecu

Lumalaika Gutito pi Nywalo Yecu

Laloc me Roma, Cecar Augucito, omiyo cik ni Lujudaya ducu myero gudok cen i boma ma kinywalogi iye wek gucone. Pi meno, Yucepu ki Maliam guwoto wa i Beterekem, ka ma jo gang pa Yucepu gia ki iye. Kare onongo dong cok pi Maliam me nywal.

I kare ma guo i Beterekem, ot mo onongo dong pe pigi nikwanyo kabedo ma kigwoko iye dyangi. Kany aye ka ma Maliam onywalo iye wode, Yecu. Oumo kome ki bongo ci opyele mot obuto i weer pa dyang.

I kabedo mo macok ki Beterekem, lukwat mogo onongo gibedo woko i dyewor ka gwoko romigi. Cutcut, lamalaika ocung i kingi ci deyo pa Jehovah oryeny orumogi woko. Lworo omako lukwat-ti matek, ento lamalaika owaco botgi ni: ‘Pe wulwor, pien akelliwu lok maber me yomcwiny. Tin kinywalo  Meciya i Beterekem.’ I cawa meno cutcut, lwak lumalaika mapol gunen i polo, kun giwaco ni: ‘Deyo obed bot Lubanga malo i wi polo, dok kuc obed i wi lobo.’ I ngeye, lumalaika gua woko ki botgi. Lukwat gudok iye nining?

Lukwat-ti guloko kekengi ni: ‘Wek wacitu wa i Beterekem.’ Gucito oyotoyot ci gunongo Yucepu ki Maliam, ki latin lakere ma gipyelo i weer pa dyang.

Dano ducu ma guwinyo guuro lok ma lumalaika gutito bot lukwat-ti. Maliam otamo matut i kom lok pa lamalaika dok wiye pe owil matwal. Lukwat gudok cen ka gwoko romigi, kun gipwoyo Jehovah pi jami ducu ma guneno dok guwinyo.

“An aa ki bot Lubanga, koni dong atye kany; pe abino pira kena, en aye oora.”​—Jon 8:42