Cit atir i jami ma tye

Cit atir ka ma nyuto lok ma tye iye

 PWONY ME 56

Yocia Onongo Maro Cik pa Lubanga

Yocia Onongo Maro Cik pa Lubanga

Yocia odoko kabaka me Juda i kare ma tye ki mwaka aboro keken. I kare meno, dano onongo gitimo tim jokjok dok giworo cal apaya. I kare ma Yocia tye ki mwaka 16, en otemo pwonyo kit me woro Jehovah i yo ma atir. I kare ma en tye ki mwaka 20, en ocako jwero cal jogi dok omuko keno tyer ma i lobo Icrael ducu. Dok i kare ma Yocia tye mwaka 26, en oketo yub me roco ot pa Jehovah.

Ilkia, lalamdog madit, otugi nongo buk me Cik i ot pa Jehovah​—ma nen calo obedo buk adola ma Moses kikome aye ocoyo. Capan, karan pa kabaka okelo buk man bot Yocia ci ocako kwano lok me Cik ki dwan malongo. I kare ma Yocia owinyo, en oniang ni lwak gubedo ka turo cik pa Jehovah pi mwaki mapol. Kabaka Yocia owaco bot Ilkia ni: ‘Jehovah tye ki akemo i komwa. Cit icipeny doge. Jehovah bititiwa gin ma myero watim.’ Jehovah ogamogi kun wok ki bot Kulda, ma lanebi ma dako, kun waco ni: ‘Jo Juda gutyeko weka woko. Gibinongo pwod, ento pe i kare me loc pa kabaka Yocia, pien en omwolle i nyima.’

I kare ma Kabaka Yocia owinyo kwena man, en ocito i ot pa Jehovah ci olwongo jo Juda ducu kacel. En okwano Cik pa Jehovah ki dwan malongo bot lwak ducu. Yocia ki jo Juda gucikke me winyo dog Jehovah ki cwinygi ducu.

Rok me Juda onongo dong gurii pi mwaki mapol ma pe gikwero nino me Kato. Ento i kare ma Yocia okwano ki i buk me Cik ni omyero kikwer  nino me Kato mwaka ki mwaka, en owaco bot lwak ni: ‘Wabikwero nino me Kato bot Jehovah.’ Ci Yocia oyubbe me tyero gitum mapol dok oketo luwer i ot pa Lubanga. Lujudaya gukwero nino me Kato. Cutcut i ngeye, gukwero nino madito me Mugati ma Tobi Pe Iye pi nino abiro. Pe tye nino mo madit me Kato ma gikwero kit man i Icrael nicakke wa i kare pa lanebi Camuel. Yocia onongo maro kwano Cik pa Lubanga. In tika imaro pwonyo lok i kom Jehovah?

“Lokki [tye] calo tara ma menyo ka tyena, dok tye calo ceng ma menyo yo ma awoto iye.”​—Jabuli 119:105