Cit atir i jami ma tye

Cit atir ka ma nyuto lok ma tye iye

 PWONY ME 67

Cel me Jerucalem

Cel me Jerucalem

Kong dong wadok cen mwaki mogo manok. Nekemia, latic pa Kabaka Aritakcec, obedo Lajudaya ma onongo bedo i boma ma i lobo Percia ma kilwongo ni Cuca. Omin Nekemia obino ki i Juda ki kwena marac man: ‘Jo ma gudok cen i Jerucalem gitye ki peko. Cel me boma ki dogcel ma jo Babilon guwango pud peya gigero.’ Lok man ocwero cwiny Nekemia matek. En onongo mito cito i Jerucalem ka miyo kony, pi meno en olego bot Lubanga ni kabaka omiye twero me cito.

Lacen, kabaka oneno ni cwiny Nekemia tye ka cwer. En owacci: ‘Pud peya aneno cwer cwiny ma kit man i wangi. Ngo marac?’ Nekemia ogamo ni: ‘Pingo pe omyero abed ki cwercwiny kun bomawa, Jerucalem, odong obwur?’ Kabaka openyo ni: ‘Gin ango ma in imito ni atim piri?’ Cutcut, Nekemia olego lalingling. Ka dong en owaco ni: ‘Alego ni, iweka acit i Jerucalem ager celle odoco.’ Kabaka Aritakcec owaco bot Nekemia ni twero cito, dok oketo yub me neno ni Nekemia bibedo maber i wotte mabor-ri. En bene oketo Nekemia me bedo gabuna me Juda dok omiye yadi pi yubo dogcel.

I kare ma Nekemia oo i Jerucalem, en ongiyo cel me Jerucalem ducu. I nge meno, en oguro lulamdog ki ludito ma giloyo lwak ci owaco botgi ni: ‘Wunen kit ma Jerucalem odong obur kwede. Myero wacaku tic.’ Dano ducu guye lokke, ci gucako tic me gero cel.

Ento lumone pa Luicrael gucako nywarogi kun giwaco ni: ‘Kadi too mamwa twero muko cel ma gitye ka gero-ni woko.’ Lugedo pe guketo cwinygi i kom lok man dok gumedde ki gedo. Gugero cel omedde malo dok obedo matek mada.

Lukworgi gucokke kacel ka piro lok me bino ki i kabedo ducu ka lweny i kom Jerucalem. I kare ma Lujudaya guwinyo lok meno, lworo omakogi matek. Ento Nekemia owaco ni: ‘Pe wubed lwor. Jehovah tye kwedwa.’ En oketo acikari ma gigwoko lutic, ci lukworgi pe gubino ka lweny.

I nino 52 keken, tic me gero cel ki dogcel otum  woko. Nekemia okelo Lulevi ducu i Jerucalem pi kwero cel me Jerucalem. En oyubogi i dul aryo pa luwer. Guwoto i wi cel kun giito i kom rwom ma tye i Dogcel me Wang It ci gudorre gurumo gang kun dul acel dok tung acuc, ki mukene dok tung acam. Gukuto burugi, guyengo ajaa, gugoyo opuk kun giwero wer bot Jehovah. Ejira ocito ki gurup acel, ki Nekemia ocito ki gurup mukene-ni, nio ka gurwatte i ot pa Lubanga. Dano ducu​—co, mon, ki lutino​—gutyero gitum mapol bot Jehovah dok cwinygi obedo yom matek. Woo me yomcwinygi owinye wa i kabedo mabor.

“Pe tye jami lweny mo ma giteto pi lweny i komi ma bicobo ticce.”​—Icaya 54:17