Cit atir i jami ma tye

Cit atir ka ma nyuto lok ma tye iye

 PWONY ME 102

Niyabo Bot Jon

Niyabo Bot Jon

I kare ma lakwena Jon tye mabuc i cula nam ma kilwongo ni Patimo, Yecu onyute ginanyuta nyo cal mapatpat ma romo 16 i kom gin ma bitimme i anyim. Ginanyuta magi nyuto kit ma kibilonyo kwede nying Jehovah, kit ma Kerre bibino kwede, ki kit ma mitine bitimme kwede i lobo kit ma tye ka timme kwede i wi polo.

I ginanyuta mo acel, Jon oneno ka Jehovah obedo i wi komker i wi polo. Ludongo 24 ma guruko bongi matar kun gurwako bene lalukana me jabu i wigi onongo gurumo komker pa Jehovah woko dyere. Lutkot obedo ka wil ki gin ma mwoc amwoca calo mwoc pa kot obedo ka a ki i kom komker. Ludongo 24 onongo giryebbe piny i nyim Jehovah ci giworo en. I ginanyuta mukene Jon oneno lwak dano mapol ata ma gia ki i rok ducu, ki i kaka ducu, ki leb-gu ducu, ma giworo Jehovah. Latin romo, ma en aye Yecu, bibedo lakwatgi ci terogi i wang it me pii me kwo. Lacen, i ginanyuta mukene, Yecu ocako loc macalo Kabaka i polo, kacel ki ludongo 24. I ginanyuta ma lubo meno, Jon oneno ka Yecu lwenyo i kom min kulu madit-ti ma en  aye Catan, kacel ki jogine. Yecu obologi woko ki i polo wa piny i lobo kany.

I ngeye, Jon oneno ginanyuta mo mamwonya adada pa Latin romo ki jo 144,000 ma gucung i Wi Got Cion. En bene oneno ka lamalaika tuk wire i wi polo kun waco ki dano ni gulwor Lubanga dok gumiye deyo.

I ginanyuta ma lubo meno, kilwenyo lweny me Armagedon. I lweny meno, Yecu kacel ki dul monnye gujwero lobo pa Catan woko. I ginanyuta me agikki, Jon oneno ribbe ki kuc i wi polo ki i wi lobo. Catan ki lulub kore ducu kijwerogi woko matwal. Jo ducu ma tye i polo ki lobo gitero nying Jehovah calo gin maleng dok giworo en keken.

“Abiketo mone i kin in ki dako, ki i kin likwayi ki likwaye; en bigoyo wii, in ibitongo opunye.”​—Acakki 3:15