Cit atir i jami ma tye

Cit atir ka ma nyuto lok ma tye iye

 PWONY ME 31

Yocwa ki Lugibeon

Yocwa ki Lugibeon

Lok i kom gin mutimme i Jeriko oromo lobe mukene me Kanaan. Kabakagi guribbe kacel wek gilweny i kom jo Icrael. Ento, jo Gibeon dok gukatti ki pulan mapat. Gin gucito bot Yocwa ma guruko bongi mutii woko, ci guwaco ni: ‘Wan waa ki i lobo mabor mada. Wawinyo pi Jehovah ki jami ducu ma yam otimo piwu i lobo Ejipt ki Moab. Dong walegowu ni wucikke kwedwa ni pe wubilwenyo i komwa, ci wan wabidoko luticwu.’

Yocwa oye lokgi ci owaco ni pe ebilwenyo i komgi. I nge nino adek, en oniang ni kara joni pe gua ki i lobo mabor. Gin onongo gia ki i lobo Kanaan. Yocwa openyo jo Gibeon ni: ‘Pingo wubwolowa?’ Gin gugamo ni: ‘Onongo walwor! Wangeyo ni Jehovah Lubangawu tye ka lweny piwu. Dong wutim ber pe wunekwa woko.’ Yocwa ogwoko cikkene ci pe onekogi.

Ma kare pud peya okato malac, kabaka abic me Kanaan guribbe ci gubino ka lweny i kom Gibeon. Yocwa ki  lumonye guwoto dyewor benebene me larogi. Odiko con, lweny otugge magwar. Jo Kanaan gucelo ngwec ma giket ata. Ka weng ma gungweco iye, Jehovah ocoro pee madongo i komgi. Ci Yocwa openyo Jehovah ni owek ceng ocung mot. Pingo en openyo Jehovah ni otim man kun ma naka yang ceng peya ocung mot? Pien Yocwa onongo tye ki gen matek i kom Jehovah. Ceng pe opoto pi nino acel olu wang ma jo Icrael gujwero kabaka me Kanaan kacel ki monygi.

“Wuwek lokwu obed ni ‘Iyo’ nyo ‘Pe’; gin mukene makato lok man nongo oa ki bot Larac.”​—Matayo 5:37