Cit atir i jami ma tye

Cit atir ka ma nyuto lok ma tye iye

 PWONY ME 75

Larac-ci Obito Yecu

Larac-ci Obito Yecu

Ma dong Yecu onongo batija, cwiny maleng otere wa i tim. En pe ocamo gin mo pi nino 40, pi meno kec ocako neke matek. Ka dong Larac-ci obino ka bito Yecu ci owacce ni: ‘Ka ada in i Wod pa Lubanga, wac ki godi magi gulokke gudok kwon.’ Ento Yecu odok iye kun tiyo ki Ginacoya ni: ‘Yam gicoyo ni dano pe myero okwo ki cam keken. Myero bene iwiny lok ducu ma Jehovah waco.’

I nge meno, Larac-ci dok otemo Yecu kun wacce ni: ‘Ka ada in i Wod pa Lubanga, pye piny ki i wi ot pa Lubanga. Yam gicoyo ni Lubanga bicwalo lumalaikane ci gitingi ki cinggi.’ Ento Yecu dok otiyo ki Ginacoya kun waco ni: ‘Yam gicoyo ni pe myero item Jehovah.’

Ka dong, Catan onyuto ki Yecu ker ducu ma i wi lobo-ni ki deyogi ducu kun wacci: ‘Abimiyo boti ker magi ducu ki deyogi ka iryebbe iwora kicel keken.’ Ento Yecu ogamo ni: ‘Cit cen, Catan! Yam gicoyo ni myero iwor Jehovah keken.’

Lacen Larac-ci oa oweke, ci malaika gubino gumiyo Yecu cam. Cakke ki i kare meno, Yecu obedo ka tito kwena maber me Ker pa Lubanga. Meno aye tic ma kicwale i lobo me timone. Dano onongo gimaro pwony pa Yecu, dok gubedo ka lubo kore ka mo keken ma en ocito iye.

“Ka en [Larac-ci] loko lok goba, en loko macalo kite tye, pien en lagoba, doki won goba.”​—Jon 8:44