Cit atir i jami ma tye

Cit atir ka ma nyuto lok ma tye iye

 PWONY ME 34

Gideon Oloyo Jo Midian

Gideon Oloyo Jo Midian

I nge kare mo, jo Icrael dok guweko woro Jehovah ci gucako woro lubange me goba. Pi mwaki abiro, jo Midian gukwalo lee pa jo Icrael dok gubalo cam ma i potigi woko. Me bwot ki i cing jo Midian, jo Icrael gubedo ka kanne i boro ki i kin godi. Gin gukok bot Jehovah ni olargi. Pi man, Jehovah ocwalo malaikane bot awobi mo ma nyinge Gideon. Malaika-ni owaco bote ni: ‘Jehovah oyeri me bedo twon oteka lweny.’ Gideon openyo ni: ‘An atwero laro jo Icrael nining? An ma konya pe-ni.’

Gideon onongo biniang nining ni Jehovah oyere? En oketo yer romo i ngom ci owaco bot Jehovah ni: ‘Odiko ka ce toyo opong i yer romo keken kun ngom ducu otwo woko, ci abingeyo ni imito ni alar jo Icrael.’ Odiko con, en onongo yer romo opong ki toyo ento ngom ducu otwo woko! Ento Gideon dok openyo ni odiko me nino ma lubo, yer romo myero obed ma otwo ento ngom obed ma dyak ki toyo. I kare ma meno otimme, Gideon dong omoko ada ni Jehovah oyere. En oguro monnye me lweny i kom jo Midian.

 Jehovah owaco bot Gideon ni: ‘Abimiyo jo Icrael giloyo lweny. Ento kit macalo itye ki mony mapol-li, giromo tamo ni gin aye guloyo lweny ki tekogi kengi. Wac ki jo ma lwor ducu ni gudok paco.’ Pi meno, monnye 22,000 gudok cen paco, ci jo 10,000 gudong. Jehovah dok owacci: ‘Mony pud pol adada. Tergi i dog pii ci iwac botgi ni gumat pii. Wek jo ma gimato pii kun gingiyo piny keken aye gudong boti.’ Dano 300 keken aye ma gumato pii kun gingiyo piny. Jehovah ocikke ni jo manok-ki aye gibiloyo mony 135,000 pa jo Midian.

I dyewor meno, Jehovah owaco bot Gideon ni: ‘Cawa dong oromo me cako lweny i kom jo Midian!’ Gideon omiyo bot jone tum ki abino ma kiketo iye mac raa. En owaco botgi ni: ‘Wunena, ci wutim kit ma an atimo.’ Gideon okuto tumme, otyero abinone, oilo mac raane malo, ka odange matek ni: ‘Pala lucwan pa Jehovah ki pa Gideon!’ Monnye 300 ducu bene gutimo kit meno. Lworo omako jo Midian matek ci gubange gucako ngwec atata. I anywena nywena man, gin gucako lweny i komgi kekengi. Jehovah dok okonyo jo Icrael me loyo lumonegi.

“Me nyuto ni tek madwong me twero obedo gire pa Lubanga, pe oa ki botwa.”​—2 Jo Korint 4:7