Cit atir i jami ma tye

Cit atir ka ma nyuto lok ma tye iye

 PWONY ME 59

Awobe Angwen ma Guwinyo Jehovah

Awobe Angwen ma Guwinyo Jehovah

I kare ma Nebukadnejar otero rwodi me Juda i Babilon, en oketo ladit wi luticce ma nyinge Acipenaj ni onen lok me gwokogi. Nebukadnejar ociko Acipenaj ni myero onong awobe ma komgi yot dok giryek loyo aloya ki i kingi. Awobe magi onongo kibipwonyogi pi mwaka adek. Pwonnye man onongo biyubogi me tic i rwom ma malo i lobo Babilon. Awobe-ni onongo myero gupwony kwano, coyo, ki loko leb pa jo Babilon. Myero bene gucam cam ma kabaka ki jo me gang kalle gicamo. Awobe angwen i kin magi gin aye Daniel, Anania, Micael, ki Ajaria. Acipenaj omiyogi nying manyen pa jo Babilon: Beltecajar, Cadrak, Mecak, ki Abednego. Pwony ma gubedo ka  nongo tika omiyo gujuko tic pi Jehovah woko?

Awobe angwen magi gumoko tamgi me woro Jehovah. Onongo gingeyo ni pe omyero gicam cam pa kabaka pien Cik pa Jehovah pe ye ni gucam lee mogo. Pi meno guwaco bot Acipenaj ni: ‘Ladit, pe idiwa me camo cam pa kabaka.’ Acipenaj owaco botgi ni: ‘Ka pe wucamo ci kabaka oneno ni komwu pe yot, en bineka woko!’

Daniel okatti ki tam maber. En owaco bot ladit ma gwokogi ni: ‘Tim ber kong imiwa pot dek ki nyig ginapita mogo ki pii amata keken pi nino apar. I nge meno, por komwa ki kom awobe ma gicamo cam pa kabaka-ni.’ Lagwok awobe oye tamme.

I nge temogi pi nino apar, Daniel ki lureme adek onongo komgi nen ma yot loyo awobe mukene-ni ducu. Jehovah onongo cwinye yom ni guwinyo doge. En omiyo bot Daniel ryeko me niang te ginanyuta ki lek.

I kare ma awobe magi gutyeko pwonnyegi, Acipenaj okelogi bot Nebukadnejar. Kabaka oloko kwedgi ci onongo ni Daniel, Anania, Micael, ki Ajaria giryek makato awobe mukene-ni ducu. En oyerogi me tic i gang kalle. Kabaka onongo pol kare penyo pi tamgi i kom jami ma pigi tego. Jehovah omiyogi ryeko makato pa luryeko ki lutyet pa kabaka ducu.

Kadi bed onongo gitye i lobo mukene, Daniel, Anania, Micael, ki Ajaria wigi pe owil woko ni gin jo pa Jehovah. In bene tika ibipo pi Jehovah, tutwalle ka lunyodoni pe gitye kacel kwedi?

“Pe imi ngat mo ocayi ni pien in pud itidi, ento bed lanen maber bot jo muye, i lokki, i kiti, i mar, i niye, ki i bedo maleng labongo gin marac mo i komi.”​—1 Temceo 4:12