Cit atir i jami ma tye

Cit atir ka ma nyuto lok ma tye iye

 PWONY ME 60

Ker ma Birii Matwal

Ker ma Birii Matwal

I dyewor mo acel, Kabaka Nebukadnejar oleko lek mo ma kite dok pat. Lek man obedo ka yelo wiye mada ma nino bene pe mako wange. En olwongo lutyet ma mege ci owaccigi ni: ‘Wugony te lekka.’ Guwaco bote ni: ‘Tit lek meno botwa, Ai kabaka.’ Ento Nebukadnejar odok iye botgi ni: ‘Pe! Wun aye wutita gin ma aleko, ka pe ci abinekowu woko.’ Gudok iye tyen me aryo ni: ‘Tittiwa gin ma ileko, ci wabinyuto tyen lok me lekke.’ En ogamo ni: ‘Wun ducu wutye ka tuko ki wiya. Wutita gin ma aleko!’ Guwaco bot kabaka ni: ‘Pe tye dano mo kadi ki acel ma twero timo meno. Gin ma itye ka penyo-ni pe twere.’

Kiniga omako Nebukadnejar matek mumiyo ociko ni kinek lutyet ki jo maryek ducu ma i lobo Babilon. I kingi onongo tye iye Daniel, Cadrak, Mecak, ki Abednego. Daniel olego kabaka ni omi kare mo. Ka dong en ki lureme gulego bot Jehovah kun gipenye ni okonygi. Ngo ma Jehovah otimo?

Jehovah onyuto lek pa Nebukadnejar kacel ki tyen lokke bot Daniel i ginanyuta i dyewor. Orwone, Daniel ocito bot latic pa kabaka ci owaco ni: ‘Pe inek laryeko mo keken. Atwero gonyo te lek pa kabaka.’ Latic-ci otero Daniel bot Nebukadnejar. Daniel owaco bot kabaka ni: ‘Lubanga onyuto boti lok ducu ma bitimme i kare me anyim. Man aye gin ma ileko: Ineno cal mo madit ma wiye kitiyo ki jabu, kore ki bade kitiyo ki ryal, iye ki eme kitiyo ki mola, oloto tyene kitiyo ki nyonyo, tyene ma kicibo kwede piny kitiyo dulle mogo ki nyonyo ki mogo kicweyo ki lobo. Got obar otyer woko ki i kom got madit, ci ocelo cal meno i tyene. Cal-li onginye matitino calo cung kal ma yamo otingo otero woko. Got ma ocelo cal-li odoko twon got madit mada ma opongo lobo ducu.’

 Daniel dok owaco ni: ‘Man aye tyen lok me lekki: Ker ma megi aye wic ma kiyubo ki jabu. Ryal-li cung pi ker ma bibino i nge locci. Lacen ker ma tye calo mola bibino, ma biloyo lobo ducu. Ker me angwenne bibedo tek calo nyonyo. I agikkine, ker ma opokke biloyo loc, ma dulle mogo bibedo tek calo nyonyo kun dulle mukene goro calo lobo. Got matidi ma doko twon got madit-ti obedo Ker pa Lubanga. Bingido ker magi ducu matitino ci en aye bicung bedo matwal.’

Nebukadnejar oryebbe piny i nyim Daniel. En owacci: ‘Lubangani aye onyuto lek man boti. Pe tye Lubanga mo calo en.’ Me kaka neko Daniel, Nebukadnejar okete me bedo ladit ma loyo luryeko ducu ki laloc i lobo ducu me Babilon. Ineno kit ma Jehovah ogamo kwede lega pa Daniel?

“Gucoko luker kacel i kabedo ma gilwongo i leb Ibru ni Armagedon.”​—Niyabo 16:16