Cit atir i jami ma tye

Cit atir ka ma nyuto lok ma tye iye

 PWONY ME 33

Ruth ki Naomi

Ruth ki Naomi

I kare ma kec opoto matek i lobo Icrael, dako mo me Icrael ma nyinge Naomi odak i lobo Moab ki cware kacel ki awobegi aryo. Lacen, cwar Naomi oto woko. Awobene aryo-ni gunyomo anyira Moab, acel nyinge Ruth ki mukene nyinge Orupa. Gin ma otimme marac aye ni, awobe aryo pa Naomi lacen bene guto woko.

I kare ma Naomi owinyo ni kec dong ogik woko i lobo Icrael, en omoko tamme me dok cen paco. Ruth ki Orupa guwoto kacel kwede, ento i kare ma gitye i yo, Naomi owaco botgi ni: ‘Wubedo mon mabeco bot awobena dok wutera bene maber. An amito ni wun dok wunyomme. Wudok cen i Moab.’ Mon-ni gugamo ni: ‘Wamari adada! Pe wamito weki keni.’ Naomi obedo ka diyogi ni gudok cen. I agikkine, Orupa odok cen, ento Ruth ocere odong. Naomi owaco bote ni: ‘Orupa tye ka dok cen paco bot jowu ki bot lubangawu. Wudok cen kwede.’ Ento Ruth owaco ni: ‘Pe abiweki matwal. Joni bibedo jona ki Lubangani bibedo Lubangana.’ Itamo ni Naomi owinyo nining i kare ma Ruth owaco lok meno?

Ruth ki Naomi guo i lobo Icrael i kare ma kicako kayo bel cayiri. I nino mo acel, Ruth ocito ka kayo kor bel ma odong i poto pa laco ma nyinge Boaj, ma obedo wod pa Rakab. Boaj owinyo ni Ruth obedo anyira Moab ma lagen ma obino ki Naomi. En owaco bot luticce ni guwek kor bel odong mapol pol i ngegi wek Ruth ocoki.

 I otyeno meno, Naomi openyo Ruth ni: ‘Tin itiyo i poto pa anga?’ Ruth ogamo ni: ‘Nying dano ma tin atiyo bote-ni aye Boaj.’ Naomi owacce ni: ‘Boaj obedo wat pa cwara. Medde ki tic i potone kacel ki anyirane. Pe tye dano mo ma bigudo komi ki kunnu.’

Ruth otiyo i poto pa Boaj nio ka kayo bel otum. Boaj oneno ni Ruth obedo dano ma latic matek dok dako ma kite ber. I kare ca, ka laco oto ma pe oweko latin laco, watte mo myero onyom dako pa lato-ni woko. Pi man Boaj onyomo Ruth. Gin gunywalo latin awobi ci gucako nyinge ni Obed, ma odoko kwaro Kabaka Daudi. Lurem Naomi gubedo ki yomcwiny madit atika. Gin guwacci: ‘Mukwongo, Jehovah omiyi Ruth, ma obedo dako ma kite ber, dok man dong itye ki latin lakwaru. Myero wapaku Jehovah piri.’

“Tye dano ma moko mere i kom lareme liking ma loyo ominne kikome.”​—Carolok 18:24