Cit atir i jami ma tye

Cit atir ka ma nyuto lok ma tye iye

 PWONY ME 80

Yecu Oyero Lukwenane Apar Wiye Aryo

Yecu Oyero Lukwenane Apar Wiye Aryo

I nge tito kwena pi mwaka acel ki nucu, Yecu onongo dong tye ki tam ma pire tek ma myero omoki. Angagi ma en onongo biyero me tic macok kwede? Anga ma en onongo bipwonyo me telo kacokke pa Lukricitayo? Me moko tam magi, Yecu onongo mito tira pa Jehovah. Pi meno en ocito kene i wi got, ci olego dyewor benebene. Ka piny oruu, Yecu olwongo lupwonnyene kacel ci oyero lukwena 12 ki i kingi. Mene ma ingeyo nyinggi? Nyinggi Petero, Anderiya, Yakobo, Jon, Pilipo, Bartolomayo, Tomaci, Matayo, Yakobo wod pa Alipayo, Tadayo, Cimon, ki Juda Iskariote.

Anderiya, Petero, Pilipo, Yakobo

Lukwena Apar Wiye Aryo-ni onongo giwoto kacel ki Yecu. I nge pwonyogi, en oorogi ka tito kwena kengi. Jehovah omiyogi teko me ryemo cen maraco ki cango lutwo.

Jon, Matayo, Bartolomayo, Tomaci

Yecu olwongo lukwena Apar Wiye Aryo-ni ni lureme, dok oketo gen i komgi. Luparicayo onongo gineno lukwena magi calo jo mogo ata ma pe gupwonnye. Ento Yecu opwonyogi  maber me tiyo ticgi. Gubedo kacel ki Yecu i kare ma pire tek loyo i kwone, calo ma en peya oto ki i nge cerre. Calo Yecu, pol pa Jo Apar Wiye Aryo-ni onongo gia ki i Galilaya. Mogo i kingi onongo gunyomme.

Yakobo wod pa Alipayo, Juda Iskariote, Tadayo, Cimon

Lukwena pa Yecu gubedo jo ma tye ki roc dok gutimo bal i kare mogo. I kine mukene guloko ata labongo kong tam iye dok gumoko tam maraco. I kare mukene onongo pe gidiyo cwinygi. Gubedo bene ka laro lok i kom anga madit loyo i kingi. Ento gire gubedo jo ma cwinygi ber dok gimaro Jehovah. Gin aye onongo gibibedo lumemba mukwongo me kacokke pa Lukricitayo kun gitiyo tic ma pire tek ka Yecu odok cen i polo.

“Alwongowu [ni] lurema, pien gin ducu ma yam awinyo ki bot Wora dong atyeko nyuttiwu.”​—Jon 15:15