Cit atir i jami ma tye

Cit atir ka ma nyuto lok ma tye iye

 PWONY ME 24

Gin Guturo Cikkegi

Gin Guturo Cikkegi

Jehovah owaco bot Moses ni: ‘Bin bota malo i wi got. Abicoyo cikka i kom kidi ma apada ci abimiyo boti.’ Moses oito malo i wi got ci obedo kunnu pi nino 40 dyeceng ki dyewor. I kare ma en tye kunnu, Jehovah ocoyo Cik Apar i kom kidi ma apada ci omiyogi bot Moses.

Ma kare pud okato manok keken, jo Icrael gutamo ni Moses owekogi woko. Guwaco bot Aron ni: ‘Wamito ngat mo ma twero telowa. Yub lubanga piwa!’ Aron owacci: ‘Wumiya jabu ma wutye kwede.’ En oliyo jabu magi ci oyubo cal lubanga ma wod twon. Lwak guwaco ni: ‘Wod twon man aye Lubangawa ma okelowa woko ki i lobo Ejipt!’ Jo Icrael gucako woro cal wod twon me jabu-ni dok gucamo karama. Meno mono obedo gin marac? Ee, pien lwak man onongo gukwonge ni gibiworo Jehovah keken. Man dong gitye ka turo gicikegi.

Jehovah oneno gin ma onongo tye ka timme, ci owaco bot Moses ni: ‘Lor piny bot lwak. Gin  gukwero bedo luwiny dong gitye ka woro lubanga me goba.’ Moses olor piny ki i wi got ki kidi apada aryo i cinge.

I kare ma Moses oo cok ki gony, en owinyo dano ka wero wer. Ci onenogi ka myel kun girumo piny giworo cal wod twon me jabu. Akemo omako Moses matek. En obolo kidi ma apada-ni piny ci gutyer guket woko. Cutcut en owango cal meno woko. Openyo Aron ni: ‘Dano gubiti me timo gin marac kuman nining?’ Aron ogamo ni: ‘Pe iwek akemo omaki i koma. In ingeyo kit jo man. Onongo gimito lubanga, pi man abolo jabu i mac ci cal wod twon man oa ki iye!’ Aron onongo myero pe otim gin man. Moses odok cen i wi got ka obako doge bot Jehovah wek otim kica i kom jone.

Jehovah oweko bal pa jo ma onongo gimito bedo luwiny bote. Tika dong ineno kit ma onongo pire tek kwede bot jo Icrael me lubo tela pa Moses?

‘Ka ikwonge bot Lubanga pe igalle, dok myero igwok kwongi; pien Lubanga cwinye pe yom i kom luming. Myero icob gin ma in dong ikwongo.’​—Latitlok 5:4