Cit atir i jami ma tye

Cit atir ka ma nyuto lok ma tye iye

 PWONY ME 98

Lukricitayo Gunya i Lobe Mapol

Lukricitayo Gunya i Lobe Mapol

Lukwena gulubo lok pa Yecu ci gutito lok me kwena maber-ri i twok lobo lung. I mwaka 47 K.M., omege ma gitye i Antiokia gucwalo Paulo ki Barnaba ka tito kwena i kabedo mogo ma tye i bor piny. Lutit kwena aryo-ni guwoto i kabedo mogo ma i Asia Minor calo Derube, Licitra, ki dong Ikonio.

Paulo ki Barnaba gutito kwena bot dano ducu, kadi gubedo lulonyo nyo lucan, jo matino nyo jo mutii. Dano mapol gujolo lok ada i kom Kricito. I kare ma Paulo ki Barnaba gutito kwena bot laloc me Caiprac, ma nyinge Cergio Paulo, latyet mo otemo jukogi. Paulo owaco bot latyet-ti ni: ‘Cing Jehovah bipoto i komi.’ Cutcut, wang latyet-ti oto woko. I kare ma Cergio Paulo oneno gin mutimme, en odoko laye.

Paulo ki Barnaba gutito kwena ka weng, i ot ki ot, i cuk, i yo gudo, ki dong i kacokke pa Lujudaya. I kare ma gucango langolo mo i Licitra, jo ma guneno tango man gucako tamo ni gubedo lubange ci gutemo worogi. Ento Paulo ki Barnaba gujukogi, kun giwacci: ‘Wuwor Lubanga keken! Wan bene wa dano.’ I nge kare manok, Lujudaya mogo gubino gupiyo lwak i kom Paulo. Lwak gucelo Paulo ki got ci guywaye gutere i nge gang, kun gitamo ni dong oto woko. Ento, Paulo onongo pud tye kwo! Cutcut, omege gucokke bote ci oa malo ka dong gudwoke i gang. Lacen, Paulo odok cen i Antiokia.

I mwaka 49 K.M., Paulo dok owoto ka tito kwena ka mabor. I nge dok cen ka limo utmege ma onongo gitye i Asia Minor, en otero lok me kwena maber-ri i kabedo mukene mabor, i lobo Ulaya. En ocito  i Atene, Epeco, Pilipi, Tecalonika, ki dong kabedo mukene. Cira, Luka, ki awobi ma nyinge Temceo gunywako wot ki Paulo. Gutiyo kacel me cako kacokke manyen kun gikonyogi me jing matek. Paulo obedo i Korint pi mwaka acel ki nucu, kun jingo omege ma kunnu. En otito kwena, opwonyo dano, dok ocoyo waraga bot kacokke mapol. En bene otiyo macalo layub kema. I nge kare mo, Paulo odok cen i Antiokia.

Lacen, i mwaka 52 K.M., Paulo owoto pi tyen me adekke ka tito kwena i bor piny, kun cako ki i Asia Minor. En owoto tung kumalo wa i Pilipi ka dok olokke odok tung kupiny wa i Korint. Obedo i Epeco pi mwaki mogo, kun pwonyo, cango dano dok konyo kacokke. En bene onongo miyo pwony bot lwak nino ducu i cukul mo. Dano mapol guwinyo lok pa Paulo ci guloko kitgi. I agikkine, i nge tito kwena maber-ri i lobe mapol, Paulo ocito i Jerucalem.

“Wuciti wucilok jo me rok ducu gudok jo ma luba.”​—Matayo 28:19