Cit atir i jami ma tye

Cit atir ka ma nyuto lok ma tye iye

 PWONY ME 92

Yecu Onen Bot Lumak Rec

Yecu Onen Bot Lumak Rec

I nge kare mo ma Yecu onen bot lukwena, Petero omoko tamme me cito ka mako rec i Nam me Galilaya. Tomaci, Yakobo, Jon, ki lupwonye mukene gucito kacel kwede. Dyewor lung nio wa odiko pe gumako rec mo.

Ma piny pud oru aruya, guneno laco mo ocung i wi tera. En openyogi ni: ‘Wumako rec mo?’ Gin gugamo ni: “Pe!” En owaco botgi ni: “Wubol obwo tung lacuc me yeya.” Ka gutimo kit ma en owaco, ci obwo opong adada ki rec, mumiyo ywayone ongayogi woko. Cutcut Jon ongeyo ni laco meno obedo Yecu ci owaco ni: “Meno Rwot!” Cutcut, Petero opye i pii ci okwang wa i wi tera. Lupwonye mukene-ni gulubo kore ki yeya.

I kare ma guo i wi tera, ci guneno mugati ki rec ma kitye ka tedone i wi keno. Yecu owaco botgi ni gukel rec mogo ma  pud gumako amaka-ni wek emedi i kom ma tye i keno-ni. Ci en owaco ni: ‘Wubin ka cam.’

I kare ma gutyeko cam, Yecu openyo Petero ni: ‘In imara ma kato mako rec? Petero ogamo ni: ‘Eyo Rwot in ingeyo ni amari.’ Yecu ogamo ni: ‘Pit lutino romina.’ Yecu dok openyo ni: ‘Petero, in imara?’ Petero owacci: ‘Rwot, in ingeyo ni amari.’ Yecu owacci: ‘Kwa lutino romina.’ Yecu dok openye tyen me adekke, ci Petero ocako kumo. En ogamo ni: ‘Rwot, in ingeyo jami ducu. In ingeyo ni an amari.’ Yecu owacci: ‘Pit lutino romina.’ Ci dok owaco bot Petero ni: ‘Medde ki lubo kora.’

‘Yecu owaco botgi ni: “Wubin wulub kora, ci an abimiyo wudoko lumak dano.” Ci cutcut gutugi weko obwogi, gulubo kore.’​—Matayo 4:19, 20