Cit atir i jami ma tye

Cit atir ka ma nyuto lok ma tye iye

 PWONY ME 48

Wod pa Dato Ocer

Wod pa Dato Ocer

I kare ma piny otwo, Jehovah owaco bot Elia ni: ‘A malo icit i Jarepat. Dato mo bimini cam kunnu.’ I kare ma en oo cok ki dog gang meno, Elia oneno dato mo ma lacan tye ka coko yen. Openyo dako-ni ni okelle pii amata. Ka dako ocako wot me kelo pii, Elia olwonge ci owacce ni: ‘Tim ber, ikella kwon mo manok.’ Ento dato-ni owaco ni: ‘Pe atye ki kwon mo ma atwero mini. Atye ki moko kwon ki moo manok ma abitedo ki cam mo manok pira ki woda.’ Elia owacce ni: ‘Jehovah ocikke ni ka imyeno kwon mo manok pira, ci moko kwon ki moo-ni pe bitum woko nio ka kot dok ocako cwer.’

Pi meno, dato-ni odok gang ci omyeno kwon pi lanebi pa Jehovah. Kit ma Jehovah ocikke kwede, dato-ni ki wode gubedo ki cam muromo i kare me oro meno ducu. Moko kwon pe otum ki i abino-ne dok moo pe orem ki i atabo.

Lacen gin mo marac adada otimme. Latin awobi pa dako-ni  kome odoko lit adada ci oto woko. En obako doge bot Elia ni okonye. Elia otingo latin woko ki i kor minne ci ocito kwede i kicika ma malo. Opyelo latin i wi kabutone ci olego ni: ‘Jehovah, wek kwo pa latin man odwog cen i kome.’ Ingeyo pingo meno onongo bibedo gin me ur adada pi Jehovah me timone? Pien nio wa i kare meno, pe tye ngat mo muto ma ocer. Dok me medo i kom meno, dato-ni gin ki wode onongo pe gubedo jo Icrael.

Ento kwo pa awobi-ni odwogo i kome, ci en ocako yweyo! Elia owaco bot dato-ni ni: ‘Nen! Wodi tye makwo ene.’ Cwinye obedo yom adada ci owaco bot Elia ni: ‘Angeyo atir ni in i dano pa Lubanga. Angeyo man pien lok ducu ma in iwaco a ki bot Jehovah.’

‘Kong wunen agak; pe gicoyo kodi, dok bene pe gikayo, pe gitye ki dula kadi dero, ento Lubanga pitogi. Wun pe piwu tek kato pi winyo?’​—Luka 12:24