Cit atir i jami ma tye

Cit atir ka ma nyuto lok ma tye iye

 PWONY ME 44

Ot pa Jehovah

Ot pa Jehovah

I kare ma Solomon odoko kabaka me Icrael, Jehovah openye ni: ‘Gin ango ma imito ni amini?’ Solomon ogamo ni: ‘An pud atidi, dok pe angeyo kit me loyo dano. Ber imiya cwiny me ryeko me loyo lwakki.’ Jehovah owacci: ‘Pien ipenyo ni amini cwiny me ryeko, abimiyo ibedo ngat ma ryek loyo ki i lobo. Abimini lonyo madwong adada. Dok ka imedde ki lubo cikka, abimiyo i rii i lobo pi kare malac.’

Solomon ocako gero ot pa Lubanga. En otiyo ki jabu, ryal, bao, ki gweng maber loyo aloya. Co ki mon alip mapol ma gitye ludiro tic gutiyo i kom ot pa Lubanga. I nge mwaka abiro, tic me gedo otum dok onongo gitye atera me dyerone bot Jehovah. Onongo tye ki keno tyer, dok gutyero iye jami mapol. Solomon ogungo piny i nyim keno tyer ci olego ni: ‘Ai Jehovah, ot ma agero-ni pe dit dok pe leng ma opore piri, ento tim ber ijol worowa dok igam legawa.’ Ngo ma Jehovah otamo i kom ot-ti ki lega pa Solomon? Cutcut ma Solomon otyeko legane, mac obino piny oa ki i polo owango gitum awanga ducu ki i wi keno tyer. Man onyuto ni cwiny Jehovah yom pi ot ma kigero pire-ni. I kare ma jo Icrael guneno man, cwinygi obedo yom matek.

Kabaka Solomon onongo ngene mada pi ryekone i lobo Icrael ki bene wa i bor piny. Dano onongo gibino bot Solomon me nongo kony pi pekkigi. Kadi wa laloc ma dako me Ceba obino ka temo Solomon ki peny mogo matego. I kare ma en owinyo lagam pa Solomon, en owacci: ‘Yam pe aye lok ma gitito bota i komi, ento kombeddi ma aneno ki wanga anongo ni ryekoni dwong makato lok ma awinyo. Lubangani, Jehovah, omini mot mapol.’ Kwo obedo maber adada pi jo Icrael, dok gubedo ki yomcwiny. Ento jami onongo dong cok lokke.

“Nen, gin madit makato Solomon tye kany.”​—Matayo 12:42