Cit atir i jami ma tye

Cit atir ka ma nyuto lok ma tye iye

 PWONY ME 32

Latela Manyen ki Mon Aryo ma Cwinygi Tek

Latela Manyen ki Mon Aryo ma Cwinygi Tek

I nge telo jo pa Jehovah pi mwaki mapol, Yocwa oto ki mwaka 110. I kare ma en pud kwo, jo Icrael onongo giworo Jehovah. Ento ma Yocwa oto, gin gucako woro cal apaya, calo jo Kanaan. Kit ma jo Icrael gukwero winyo Jehovah, en oweko kabaka mo me Kanaan ma nyinge Jabin ounogi matek. Jo Icrael gubako doggi bot Jehovah ni okonygi. Pi man, Jehovah ominigi latela manyen ma nyinge Barak. En aye okonyo jo Icrael me dwogo bot Jehovah.

Lanebi mo ma dako ma nyinge Debora ocwalo kwena, olwongo Barak. En onongo mito tito bot Barak lok man mua ki bot Jehovah: ‘Kwany co 10,000 ci wucit ka kemme ki mony pa Jabin i dog kulu Kicon. Ibiloyo lweny i kom Cicera ki kunnu.’ Barak owaco bot Debora ni: ‘Ka in iye me cito kweda, ci abicito.’ Debora ogamo ni: ‘Abicito kwedi. Ento pe in aye bineko Cicera. Jehovah owaco ni dako mo aye bineke.’

Debora ocito ki Barak kacel ki dul monnye wa i Got Tabor wek giyubbe pi lweny. I kare ma Cicera owinyo lok man, en ocoko  wegi gadigadine ki monnye ducu i nota kulu Kicon. Debora owaco bot Barak ni: ‘Tin aye nino ma Jehovah bimiyo iloyo lukworri.’ Barak ki jone 10,000 gucako lor piny ki i wi got ka kemme ki mony pa Cicera.

Jehovah omiyo kulu Kicon opong libyeny wa i wi tera. Gadigadi pa Cicera omoko i coto. Pi man, en opye woko ki i gadigadine ci ocako ringo ki tyene. Barak ki lumonye gujwero mony pa Cicera, ento Cicera olwi woko! En ongweco ocito okanne i kema pa dako mo ma nyinge Yayeri. Yayeri omiyo bot Cicera cak ni omati, ci oumo kome ki batania. Oteka lweny man ma ool-ni onino woko bokbok. Ka dong Yayeri olibbe mot mot ci oguro yat lagur kema i wiye oneke woko.

Barak obino ka yenyo Cicera. Yayeri okato woko ki i kema ci owacce ni: ‘Dony i iye. Abinyutti dano ma itye ka yenyone-ni.’ Barak odonyo i kema ci oneno Cicera oto woko. Barak ki Debora gupako Jehovah ki wer pi miyo lukworgi i cinggi. Pi mwaka 40, jo Icrael gubedo ki kuc.

“Mon ame tero amut [kwena] aberi, pol meicel.”​—Jabuli 68:11, Baibul me leb Lango