Cit atir i jami ma tye

Cit atir ka ma nyuto lok ma tye iye

 PWONY ME 49

Kipwodo Daker ma Kite Rac

Kipwodo Daker ma Kite Rac

Ki i wang dirica me gang kalle i Jejreel, Kabaka Akab onongo twero neno poto olok pa laco mo ma nyinge Nabot. Akab onongo mito poto olok man, ci otemo wilone ki bot Nabot. Ento Nabot okwero catone bote pien Cik pa Jehovah onongo pe ye cato ngom kwaro. Tika Akab oworo Nabot pi timo gin matir? Pe. Kiniga omako Akab matek. Cwinye ocwer ma pe romo kato woko ki i ot buto, dok okwero camo cam.

Dako pa Akab, Daker Jejebel ma kite racci, owaco bote ni: ‘Pe in aye iloyo Icrael? Itwero bedo ki gin mo keken ma imito. An aye abimiyi ngom meno.’ Jejebel ocoyo waraga bot ludito me boma man kun waco ni omyero kicel Nabot ki got kinek woko pi ceno Lubanga. Ludito gutimo kit ma Jejebel ocoyo kwede, dong Jejebel owaco bot Akab ni: ‘Nabot dong oto woko. A malo igam poto olokke.’

Nabot keken aye pe obedo dano ma kite atir ma Jejebel oneko. En oneko jo mapol ma gimaro Jehovah. En oworo cal apaya mapol dok otimo jami mukene maraco. Jehovah oneno jami ducu ma Jejebel otimo. Ngo ma en otimo i kom Jejebel?

I kare ma Akab oto, wode Joram odoko kabaka. Jehovah ooro laco mo ma nyinge Yeko ka pwodo daker Jejebel ki jo me ode.

Yeko ongweco ki gadigadine wa i Jejreel, ka ma daker Jejebel bedo iye. Joram ocito ki gadigadine ka rwatte ki Yeko ci openye ni: ‘Ibino ki kuc bo?’ Yeko ogamo ni: ‘Kit kuc ango ma dok bedo tye-ni ma kun meni Jejebel tye ka timo jami maraco.’ Joram otemo wiro gadigadine wek ering woko. Ento Yeko otelo atumme, ci obayo ocelo Joram oneko woko.

I ngeye, Yeko ocito i gang kal pa  Jejebel. I kare ma Jejebel owinyo ni Yeko tye ka bino, en owiro wange maleng, okedo wiye, ci ocako neno woko ki i wang dirica. I kare ma Yeko oo, Jejebel oloko bote ki gero. Yeko odange bot lutic pa Jejebel ma onongo gucung cok kwede kun wacci: “Wubole woko piny!” Ci gutingo Jejebel gubole woko piny ki i wang ot, en opoto oto woko.

I nge meno, Yeko oneko awobe pa Akab gin 70 ducu ci en ojwayo woro Baal woko ki i lobo Icrael. Tika dong ineno ni Jehovah ngeyo jami ducu dok ka karene oromo en pwodo jo ma timo jami maraco?

“Ginaleya ma ilimo oyotoyot i acakki, pe ibilimo iye gum i agikkine.”​—Carolok 20:21