Cit atir i jami ma tye

Cit atir ka ma nyuto lok ma tye iye

 PWONY ME 37

Jehovah Oloko bot Camuel

Jehovah Oloko bot Camuel

Lalamdog Madit Eli onongo tye ki awobe aryo ma gitiyo macalo lulamdog i kema me woro. Nyinggi Kopuni ki Finekaci. Gin onongo pe giworo cik pa Jehovah, dok gitero dano i yo marac adada. Ka jo Icrael gukelo gitum bot Jehovah, Kopuni ki Finekaci onongo gimayo ringo maber loyo pigi kengi. Eli owinyo pi jami ducu maraco ma awobene gubedo ka timo, ento en pe ojukogi. Jehovah tika onongo biweko timgi maraco-ni medde ameda?

Kadi bed ni Camuel onongo pud latin matidi ka kiporo ki Kopuni ki Finekaci, ento en pe olubo lanengi. Cwiny Jehovah obedo yom i kom Camuel. I dyewor mo acel ma Camuel tye ka nino, en owinyo ka dwan mo lwongo nyinge. En oa malo, oringo bot Eli, ci owaco ni: ‘An a en!’ Ento Eli owaco ni: ‘An pe alwongi. Dok ibut piny.’ Camuel odok cen i kabuto. Dwan man dok owinye. I kare ma Camuel owinyo dwan-ni tyen me adek-ke, Eli oniang ni Jehovah aye kara tye ka lwongo Camuel. En owaco bot Camuel ni ka en dok owinyo dwan-ni ci myero ogam ni: ‘Jehovah, wac lokki. An laticci atye ka winyone.’

Camuel odok cen i kabuto. Ci owinyo dwan meno lwonge ni: ‘Camuel! Camuel!’ En ogamo ni: ‘Wac lokki, an laticci atye ka  winyone.’ Jehovah owacce ni: ‘Tit bot Eli ni apibwodo en kacel ki jo me ode. En ngeyo ni awobene gitye ka timo jami maraco i kema me woro, ento pe jukogi.’ Orwone, Camuel oyabo doggola me kema me woro, kit ma timo kwede nino ducu. Onongo en lworo tito bot lalamdog madit gin ma Jehovah owacce. Ento Eli olwonge ci openye ni: ‘Latinna, Jehovah otitti lok ango? Pe imunga lok mo.’ Pi meno, Camuel otito bot Eli lok ducu.

Camuel omedde ki dongo, dok Jehovah omedde ki bedo lareme. I lobo Icrael ducu, dano ongeyo ni Jehovah oyero Camuel me bedo lanebi ki langolkop.

“I kare me tinoni, ber ipo kom Lacwec mucweyo in.”​—Latitlok 12:1