Cit atir i jami ma tye

Cit atir ka ma nyuto lok ma tye iye

 PWONY ME 68

Elicabet Onywalo Latin

Elicabet Onywalo Latin

Mwaki makato 400 ma kityeko gero odoco cel me Jerucalem, lalamdog mo ma nyinge Jekaria ki dakone, Elicabet, onongo gibedo cok ki boma me Jerucalem. Gin onongo dong gurii i nyom pi mwaki mapol ento gipe ki latin mo. I nino mo acel ma Jekaria tye ka wango odok eceta i ot pa Jehovah, malaika Gabriel obino bote. Lworo omako Jekaria matek, ento Gabriel owacce ni: ‘Pe ilwor. Akelo boti kwena maber ma oa ki bot Jehovah. Dakoni, Elicabet, binywalo latin laco dok ibicako nyinge ni Jon. Jehovah oyero Jon pi tic mo ma pire tek.’ Jekaria openyo ni: ‘Atwero ye lokki nining? Wan ki dakona dong watii woko ma pe watwero nywalo latin.’ Gabriel owaco ni: ‘Lubanga aye oora me kelo boti kwena man. Ento pien in pe iye lokka, ibibedo ma pe itwero lok nio wa i kare ma kibinywalo latin man.’

Jekaria orii i ot pa Lubanga makato kit ma jwi. Pi meno i kare ma en dong okato woko, dano ma gitye woko onongo gimito ngeyo gin mutimme. Jekaria onongo pe twero lok. En obedo ka tic ki cinge keken me lok kwedgi. Ka dong dano guniang ni Jekaria kara onongo kwena ki bot Lubanga.

Ka kare okato manok, Elicabet ogamo ic ci onywalo latin laco, kit ma lamalaika onongo owaco kwede. Luremgi ki wadigi gubino ka neno latin. Cwinygi obedo yom kacel kwede. Elicabet owaco ni: ‘Gibilwonge ni Jon.’ Guwaco ni: ‘Pe tye ngat mo ma nyinge Jon i kin wadiwu ducu. Cak nyinge ni Jekaria, calo wonne.’ Ento Jekaria ocoyo ni: ‘Nyinge Jon.’ Cutcut i cawa meno, Jekaria ocako lok doki! Lok i kom latin man oywek i lobo Judaya, dok dano gubedo ka pennye ni: ‘Latin man kite bibedo nining?’

Jekaria opong ki cwiny maleng. En oloko macalo lanebi ni: ‘Kipak Jehovah. En ocikke bot Abraim ni  Ebicwalo lalar, ma en Meciya me larowa. Jon bibedo lanebi, dok en biyubo yo pi Meciya.’

Gin mo me aura bene otimme i kom wat pa Elicabet ma nyinge Maliam. Wabineno lok meno i dul ma lubo man.

“Ki bot dano man pe twerre, ento ki bot Lubanga jami ducu twerre.”​—Matayo 19:26