Cit atir i jami ma tye

Cit atir ka ma nyuto lok ma tye iye

 PWONY ME 62

Ker ma Kiporo ki Yat Madit

Ker ma Kiporo ki Yat Madit

I dyewor mo acel, Nebukadnejar oleko lek ma omiye lworo madit. En olwongo luryekone ducu bote me gonyo tyen lok me lek meno. Ento pe tye kadi ngat acel mo ma ogonyo te lekke. Lacen, kabaka oloko ki Daniel.

Nebukadnejar owaco bot Daniel ni: ‘I lekka, aneno yat mo. Yat-ti odongo mabor mukato kare woko ma wiye ogudo polo. Onongo nen woko ki i agikki lobo ducu. Pote ducu onongo nen mabeco dok nyige pol mada. Lee tim giywe i te tipone, ki winyo bene gibedo i jange ducu. Ka dong lamalaika mo obino ki i polo. En odange matek ni: “Tong yat meno iret woko piny, ci itong jange bene ducu. Ento wek ajutte ki lwite mucung i ngom, ci itwe ajutte woko ki rubota nyonyo ki mola. Wek kilok cwiny yatti woko ki i cwiny dano ci gimiye obed ki cwiny lee, wek orii mwaka abiro. Dano ducu gibingeyo ni Lubanga Mamalo Twal aye Laloc dok tye ki twero me miyo ker bot ngat ma iye mito.”’

Jehovah ogonyo te lek man bot Daniel. I kare ma Daniel oniang tyen lok me lek meno, lworo omake matek. En owacci: ‘Ai kabaka, kono onongo lek man tye i kom lukworri kono ber, ento tye i komi aye. Yat madit ma kitongo woko-ni en aye in. Kibiryemi woko ki i komker-ri, dok ibicamo lum calo lee tim. Ento kit macalo malaika ociko ni giwek ajut yat ki lwite, ibibedo kabaka doki.’

I nge mwaka acel, Nebukadnejar onongo tye ka wot i wi ot me gang kalle, kun neno boma me Babilon. En owacci: ‘Kong inen kit ma boma ma an agero-ni mwonya kwede. Nen kong kit ma atek kwede!’ I kare ma en pud tye ka lok, dwan mo oa ki i polo ma wacci: ‘Nebukadnejar! Ker dong kikwanyo woko ki boti.’

Cutcut i cawa meno, Nebukadnejar odoko lapoya dok ocako kwo calo lee tim. Kiryeme woko ki i gang kalle dok owoto ocako bedo i kin lee tim. Yer wi Nebukadnejar olot calo yer kom ocur, ki lwete bene olot maboco calo lwet winyo.

 I nge mwaka abiro, Nebukadnejar kome ocang woko ci Jehovah odwoke cen i kerre macalo kabaka me Babilon. Nebukadnejar dong owacci: ‘Apako in Jehovah, Kabaka me polo. Kombeddi dong angeyo ada ni Jehovah aye Laloc. En kwanyo rwom pa jo ma luwakke woko, dok miyo ker bot ngat ma en mito.’

“Wakke tero dano i can, ki cwiny me nyatte miyo dano poto i can.”​—Carolok 16:18