Cit atir i jami ma tye

Cit atir ka ma nyuto lok ma tye iye

 PWONY ME 77

Dako ma i Wang Pii

Dako ma i Wang Pii

Kare mo i nge kwer me Kato, Yecu ki lulub kore guwoto ki i Camaria i kare ma gitye ka dok cen i Galilaya. I kare ma guo cok ki boma me Cukar, Yecu ocung ka ma kilwongo ni wang it pa Yakobo. En obedo piny ka yweyo, kun lulub kore guwoto i boma ka wilo cam.

Dako mo obino ka twomo pii. Yecu owacce ni: “Miya pii, amati.” En ogamo ni: ‘Pingo itye ka lok kweda? An a dako me Camaria. Lujudaya pe giloko ki jo Camaria.’ Yecu owaco bote ni: ‘Kono ingeyo ngat ma an abedo, kono ikwayo an wek ami pii me kwo.’ Dako-ni odok iye ni, ‘Pe aniang lokki maber. Pe itye wa ki gitwomo pii.’ Yecu owaco ni: ‘Dano ma bimato pii ma an abimiye, orwo pe bineke matwal.’ Dako-ni owaco ni: “Ladit, miya pii meno.”

Yecu owacce ni: ‘Cit ilwong cwari obin i wang it kany.’ En ogamo ni: “An cwara pe.” Yecu owaco ni: ‘Itye ka loko lok ada. In dong kinyomi tyen abic, dok laco ma itye ka bedo kwede-ni pe cwari.’ Dako-ni ogamo ni: ‘Ladit, aneno ni in giri lanebi. Jowa giye ni watwero woro Lubanga i wi got man ento Lujudaya giwaco ni myero wawor Lubanga i Jerucalem keken. Angeyo ni ka Meciya obino, en bipwonyowa kit me woro Lubanga.’ Yecu owaco bot dako-ni lok ma en onongo peya otito ki ngat mukene ni: ‘An aye Meciya.’

 Dako-ni oringo i boma ci owaco bot Lucamaria mukene ni: ‘Atamo ni anongo Meciya. En ngeyo lok ducu i koma. Wubin, wunen!’ Gulubo kor dako-ni wa i wang pii ci guwinyo pwony pa Yecu.

Lucamaria gujolo Yecu ni obed i bomagi. Pi nino aryo, en opwonyogi, ci jo mapol guye en. Guwaco bot dako me Camaria-ni ni: ‘I nge winyo pwony pa laco-ni, dong waniang ni en aye lalar me lobo.’

“‘Bin!’ Ngat ma orwo neko myero obin, wek ngat ma mito bene omat pii me kwo labongo wel.”​—Niyabo 22:17