Cit atir i jami ma tye

Cit atir ka ma nyuto lok ma tye iye

 PWONY ME 4

Akemo Okelo Nek

Akemo Okelo Nek

I kare ma Adam ki Kawa guweko poto me Eden, gunywalo lutino mapol. Latin kayogi, Kain, odoko lapwur, ki dong latingi me aryo, Abel odoko lakwat.

Nino mo acel, Kain gin ki Abel gutyero gityer bot Jehovah. Tika ingeyo gin ma gityer obedo? Obedo mic mo ma kite dok pat. Cwiny Jehovah obedo yom pi gityer pa Abel, ento cwinye pe obedo yom pi gityer pa Kain. Man omiyo Kain okeco adada. Jehovah ociko Kain ni akemone romo miyo en timo bal. Ento Kain pe owinyo Lubanga.

Ma ka meno, Kain owaco bot Abel ni: ‘Bin wacit i poto.’ I kare ma gitye kengi i poto, Kain ogoyo ominne ci  oneke woko. Ngo ma Jehovah otimo pi bal man? Jehovah opwodo Kain ki cwale ka mabor ki bot lupacone. Lubanga pe oye ni Kain odwog cen paco.

Pwony ango ma wanongo ki i gin mutimme man? Waromo cako bedo ki akemo ka jami pe tye ka timme kit ma wamito. Ka akemo tye ka dongo i cwinywa​—nyo ka jo mukene gucikowa pien guneno gero ma watye kwede​—myero warune me loko kit ma wawinyo kwede ma peya akemo meno oterowa me timo bal.

Kit ma Abel omaro Jehovah dok otimo gin matir, Jehovah wiye pe biwil i kome matwal. Lubanga bicero en me kwo i lobo me paradic.

“Mukwongo kong wumer wuribbe ki omeru, ka lacen dong idwogi ityer motti.”​​—Matayo 5:24