Cit atir i jami ma tye

Cit atir ka ma nyuto lok ma tye iye

 PWONY ME 87

Kwer me Kato me Agikki pa Yecu

Kwer me Kato me Agikki pa Yecu

Lujudaya onongo gikwero kwer me Kato mwaka ki mwaka i nino dwe 14 me dwe me Nican. Kwer man onongo tye me poyo wigi i kom kit ma Jehovah ogonyogi kwede ki i opii i lobo Ejipt ci okelogi i Lobo ma Kiciko Pire. I mwaka 33 K.M., Yecu kacel ki lukwenane gukwero kwer me Kato i rum mo ma malo i Jerucalem. I nge cam meno, Yecu owaco ni: ‘Ngat acel i kinwu aye bidota.’ Lukwena guuro lokke mada, ci gupenyo Yecu ni: ‘Anga-ni?’ Yecu ogamo ni: ‘En aye ngat ma abimiyo mugati man bote.’ Ci omiyo mugati bot Juda Iskariote. Cutcut, Juda oa malo okato woko.

I ngeye, Yecu olego ka ocako baro i mugati, omiyo bot lukwena ma gudong-ngi. En owaco ni: ‘Wucam mugati man. Cung pi koma, ma abimiyone piwu.’ En dok opwoyo Lubanga pi kongo vino ci omiyo bot lukwenane, kun waco ni: ‘Wumat kongo vino-ni. Cung pi remona, ma abionyo wek kitim kica pi bal. Acikke ni wubibedo luker kacel kweda i wi polo. Wutim kuman mwaka ducu me po pira.’ Mwaka ki mwaka, lulub kor Yecu pud gicokke kacel i otyeno meno. Cokke meno kilwongo ni Cam me Otyeno pa Rwot.

 I nge cam, lukwena gularo lok i kom ngat ma pire tek loyo i kingi. Ento Yecu owaco botgi ni: ‘Ngat madit i kinwu aye ngat ma nenne kekene calo ngat matidi, nyo ngat ma pire pe tek.’

‘Wun lurema. Atittiwu jami ducu ma Wora mito ni awacciwu. Cokcok-ki, abicito bot Wora i polo. Wun wubidong kany, ento dano ducu bingeyo ni wun lupwonnyena ka mar tye i kinwu. Omyero wumarre kekenwu kit macalo amarowu kwede.’

Lacen, Yecu olego kun kwayo Jehovah ni ogwok lupwonnyene ducu. En okwayo Jehovah ni okonygi me tic kacel kun gigwoko kuc i kingi. En olego ni kilony nying Jehovah. I ngeye, Yecu ki lukwenane guwero wer me pako Jehovah ci gukato woko. Kare me mako Yecu onongo dong cok.

“Pe wulwor, wun romi manok, pien Wonwu oye atika me miyo botwu ker.”​—Luka 12:32