Cit atir i jami ma tye

Cit atir ka ma nyuto lok ma tye iye

 PWONY ME 14

Opii ma Owinyo Lubanga

Opii ma Owinyo Lubanga

Kinywalo Yucepu ma wonne Yakobo dong otii woko. Pi meno, wonne onongo marre loyo omegine mukene-ni. Itamo ni gin guwinyo nining? Nyeko omakogi matek i kom Yucepu dok onongo gidage mada. I kare mo ma Yucepu oleko lek mogo ma gipat adada, en otito lek magi bot omegine. Gutamo ni lek-ki te lokke ni nino mo gin gibikule i nyim Yucepu. Man omiyo gin dong gudage adada!

Nino mo acel, omegi Yucepu onongo gitye ka kwayo romi cok ki boma me Cekem. Yakobo ooro Yucepu me neno kit ma gitye kwede. Ma guneno ka Yucepu tye ka bino ki ka mabor, ci guloko i kingi kekengi ni: ‘Lalek-ki eno tye ka bino. Waneke woko!’ Gumake ci gubole i bur matut. Ento ominne ma nyinge Juda owacci: ‘Pe wuneke! Me ka meno, wacate macalo opii.’ Pi meno, gin gucato Yucepu bot lucatwil me Midian ma gitye ka cito i Ejipt pi cekel me ryal 20.

Ka dong, omegi Yucepu guluto kanyine i remo dyel, ci gucwalo kanyine bot wongi kun giwacci: ‘Man mono pe kanyi pa wodi?’ Pi meno Yakobo otamo ni lee mo mager omwodo Yucepu woko. Cwinye ocwer matek. Onongo pe tye ngat mo ma twero kweyo cwinye.

I Ejipt, kicato Yucepu macalo opii bot ladit tic pa Parao ma nyinge Potipar. Ento Jehovah onongo tye ki Yucepu. Potipar oneno ni Yucepu timo ticce ducu maber dok genne. Ma peya otero kare malac, kiketo Yucepu macalo lalo jami ducu pa Potipar.

Dako pa Potipar oneno ni Yucepu nen mabulobulo dok mwonya  matek. Nino ki nino, en obedo ka penyo Yucepu ni obut kwede. Ngo ma Yucepu otimo? En okwero woko kun wacci: ‘Pe! Meno gin marac. Laditta gena, dok in ibedo dakone. Ka abuto kwedi, nongo atimo bal madit i nyim Lubanga!’

Nino mo acel dako pa Potipar otemo diyo Yucepu tektek me buto kwede. En omako Yucepu ki bongone, ento Yucepu ongweco woko. I kare ma Potipar odwogo gang, en owaco ni Yucepu otemo buto kwede tektek. Ento en onongo tye ka loko lok goba. Potipar okeco adada, ci obolo Yucepu i buc. Ento wi Jehovah pe owil i kom Yucepu.

“Wumwolle kenwu i te twero pa Lubanga, wek ka kare oromo en otingwu malo.”​—1 Petero 5:6