Cit atir i jami ma tye

Cit atir ka ma nyuto lok ma tye iye

 PWONY ME 15

Jehovah Wiye Pe Owil i kom Yucepu

Jehovah Wiye Pe Owil i kom Yucepu

Ma Yucepu tye i buc, Parao, kabaka me Ejipt, oleko lek ma ngat mo pe twero gonyo tere. Latic pa Parao acel otito bote ni Yucepu romo gonyo te lek meno. Cutcut Parao ocwalo dano me kelo Yucepu.

Parao openyo Yucepu ni: ‘Tika iromo gonyo te lek ma aleko-ni?’ Yucepu otito bot Parao ni: ‘Ejipt biceko cam mapol pi mwaka abiro, dok bibedo ki kec pi mwaka abiro. Yer ngat mo maryek me gwoko cam wek kec pe onek dano.’ Parao ogamo ni: ‘Ayero in! In aye ibibedo lalub kora i lobo Ejipt ducu!’ Yucepu ocako ngeyo te lek pa Parao nining? Jehovah aye okonyo Yucepu.

Pi mwaka abiro ma lubo meno, Yucepu obedo ka gwoko cam. I nge meno, kec opoto i wi lobo ducu, kit ma Yucepu otito kwede. Dano gubino ki i kabedo ducu me wilo cam ki bot Yucepu. Wonne Yakobo owinyo ni cam tye i Ejipt, pi meno en ooro awobene apar kunnu ka wilo cam.

Awobe pa Yakobo gucito bot Yucepu, dok en ongeyogi cutcut. Ento omegine pe guniang ni meno aye Yucepu. Gukulle i nyimme kit ma en onongo oleko kwede i kare ma pud tidi. Yucepu onongo mito ngeyo ka omegine pud gitye ki adage. Pi meno en owaco botgi ni: ‘Wun lurot-piny. Wun wubino me ngeyo ka ma lobowa goro iye.’ Guwacci: ‘Pe! Wan watye omege 12 ma waa ki i lobo Kanaan. Ominwa acel oto woko, dok ominwa matidi loyo odong paco bot wonwa.’ Ci Yucepu  owaco botgi ni: ‘Wukel ominwu matidi-ni bota, ci abiye lokwu.’ Pi meno, gin gudok cen gang bot wongi.

I kare ma jo me ot pa Yakobo camgi otum woko, en dok ocwalo awobene i Ejipt. I wotgi man, gutero omingi matidi Benjamin. Me temo cwiny omegine, Yucepu okano kikopone me ryal i kicaa pa Benjamin ci owaco ni gin gukwalo kikopo man akwala. Ma lutic pa Yucepu gunongo kikopo man i kicaa pa Benjamin, cwiny omegine oballe woko. Gin gulego ni Yucepu pe opwod Benjamin ento opwod gin aye.

Man oweko Yucepu ongeyo ni omegine dong kitgi olokke woko. Yucepu onongo dong pe twero diyo cwinye pi kare malac. En ocako koko matek ci owacci: ‘An ominwu Yucepu. Wora mono pud tye makwo?’ Omegine gubedo ki ur madit. En owaco botgi ni: ‘Pe wubed ki cwercwiny pi gin ma wutimo i koma. Lubanga aye yam ocwala kany wek alar kwowu. Dong wucit oyotoyot wukel babana kany.’

Gin gudok gang me tito kwena maber man bot wongi ki me kele i Ejipt. I nge mwaki mapol, Yucepu gin ki wonne dok guribbe.

“Ka pe wutimo kica bot dano pi balgi, ci Wonwu ma tye i polo bene pe bitimowu kica pi balwu.”​—Matayo 6:15