Cit atir i jami ma tye

Cit atir ka ma nyuto lok ma tye iye

 PWONY ME 65

Esta Olaro Jone

Esta Olaro Jone

Esta obedo anyaka ma Lajudaya ma onongo bedo i boma me Percia ma kilwongo ni Cuca. Mwaki mapol angec, Nebukadnejar onongo otero jo ganggi ki i Jerucalem i opii. Mordekai, wod pa omin won Esta, obedo latic pa Kabaka Akacwero me Percia, dok en aye opito Esta.

Kabaka Akacwero onongo mito daker manyen. Luticce gucoko anyira maleng loyo ki i lobo Percia, kadiwa Esta ci gikelogi bot kabaka. Ki i kin anyira-ni ducu, kabaka oyero Esta me bedo daker. Mordekai ociko Esta ni pe otit ni en Lajudaya.

Laco mo ma lawaka ma nyinge Aman aye onongo loyo rwodi ducu. En onongo mito ni dano ducu gukulle piny i nyimme. Mordekai okwero kulle piny i nyimme, pi man akemo omako Aman matek adada mumiyo en ocako yenyo yo me neko Mordekai. I kare ma Aman oniang ni Mordekai obedo Lajudaya, en oyubo pulan me neko Lujudaya ducu ma i lobo Percia. Owaco bot kabaka ni: ‘Lujudaya gubedo jo maraco; myero inekgi woko.’ Akacwero owaco ni: ‘Tim kit ma imito,’ ci omiyo bote twero me moko cik. Aman omoko cik ma waco ni dano myero gunek Lujudaya ducu i nino dwe 13 me dwe me Adar. Jehovah obedo ka neno jami ducu.

Esta onongo pe ngeyo gin mo i kom cik-ki. Pi meno, Mordekai ocwale kopi me waraga me cik-ki ci owacce ni: ‘Cit ilok bot kabaka.’ Esta owaco ni: ‘Ngat mo keken ma cito i nyim kabaka ma pe kilwonge alwonga myero kinek woko. Kabaka peya olwonga i nyimme pi nino 30 kulu! Ento abicito gire. Ka en oilo odoo kerre tung bota, ci abikwo. Ento ka pe, ci abito woko.’

Esta ocito wa i dyekal ma i ot pa kabaka. I kare ma kabaka onene, en oilo odoo kerre tung bot Esta. Esta owoto bote, ci en openyo ni: ‘Imito ni atimmi gin ango, Esta?’ En owaco ni: ‘Amito ni  wubin wun ki Aman pi karama mo ma ayubo piwu.’ Ki kunnu, Esta dok olwongogi pi karama mukene. I karama me aryone, kabaka dok openyo ni: ‘Imito ni atimmi gin ango?’ Esta owaco ni: ‘Ngat moni binekowa woko, an ki jo me rokwa. Konywa ilwarwa do.’ Kabaka openyo ni: ‘Meno anga ma mito nekowu-ni?’ Esta ogamo ni: ‘Meno Aman ma kite rac-ci.’ Kiniga omako Akacwero matek adada mumiyo en owacci kinek Aman cutcut.

Ento, onongo pe tye ngat mo ma twero loko cik pa Aman, kadi wa kabaka. Pi meno, kabaka oketo Mordekai me loyo wi rwodi dok omiyo bote twero me moko cik manyen. Mordekai oketo cik manyen ma ye ni Lujudaya myero gulweny me gwoko komgi. I nino dwe 13 me Adar, Lujudaya guloyo lumonegi woko. Cakke i kare meno, gubedo ka kwero nino man mwaka ki mwaka.

“Gibiywayowu giterowu i nyim luloc ki luker-gu pira, wubitito lok ma bedo caden botgi ki bot Lurok bene.”​—Matayo 10:18