Cit atir i jami ma tye

Cit atir ka ma nyuto lok ma tye iye

Waraga Mua ki bot Lukiko Madit

Waraga Mua ki bot Lukiko Madit

Utmegiwa me Amara:

Macalo luwor Jehovah, wan wamaro Lokke, Baibul. Waye labongo akalakala mo ni lok ma iye tye kakare, miyowa tira maber i kwowa, dok nyuto mar pa Jehovah pi dano ducu. (Jabuli 119:105; Luka 1:3; 1 Jon 4:19) Watye ki miti madit me konyo jo mukene wek gupwony lok me ada ma tye i Baibul. Pi meno, cwinywa yom me cwalo woko buk man ma wiye tye ni, “Pwony ma Itwero Nongo ki i Baibul.” Wek kong watittiwu jami mogo ma tye i buk man.

Buk man kiyubo tutwalle pi lutino. Ento, watwero bene tic kwede me konyo jo madongo ma gimito pwonyo lok i kom Baibul. Dok kit macalo Baibul obedo buk pi jo ducu, labongo akalakala mo wan ducu wabinongo adwogi maber ki i kwanone, ma bikonyowa me nongo yomcwiny me ada.

Buk man tito gin ma Baibul owaco i kom kwo pa dano cakke ki i kare me cwec cito kwede anyim. Kiyelle matek me tito jami mutimme i Baibul i yo ma niang iye yot dok kore ki kore ma lubbe ki kare ma gutimme iye.

Ento, buk man pe tito mere jami mutimme i Baibul keken. Coc ki cal ma iye kiyubo i yo ma konyowa me goyo i wiwa jami mutimme ki me niang kit ma jone guwinyo kwede.

Buk man konyowa me neno ni Baibul obedo buk ma loko i kom dano​—ma guwinyo Jehovah ki ma gukwero winye. Dok cuko cwinywa me nongo pwony ki i lanen pa dano magi. (Jo Roma 15:4; 1 Jo Korint 10:6) Buk man kipoko iye i bute 14. I  acakki me bute acel acel kiloko wiye wiye i kom pwony mogo ma watwero nongo ki i iye.

Ka in lanyodo, itwero kwano pwony moni ki latinni ci wunyamo cal ma i pwony meno. I ngeye, wuromo kwano wang Baibul ma pwony meno jenge iye. Kony latinni me kubo gin ma en okwano i Baibul ki pwony ma i buk-ki. Iromo tic ki yo acel-li ka itye ka konyo dano madit me niang wiye wiye kwena ma tye i Baibul.

Walego ni buk man okony jo ducu ma cwinygi atir​—lutino wa ki ludito​—me nongo pwony ki i Lok pa Lubanga ki me keto pwonye i tic i kwogi. Macalo adwogine, gin bene gitwero ribbe kwedwa i woro Jehovah macalo jo me otte.

Wan utmegiwu,

Lukiko Madit pa Lucaden pa Jehovah