Cit atir i jami ma tye

Cit atir ka ma nyuto lok ma tye iye

 PWONY ME 16

Yubu Obedo Anga?

Yubu Obedo Anga?

I lobo Uj, onongo tye laco mo ma woro Jehovah. Nyinge Yubu. En onongo olony adada dok tye ki lutino mapol. En onongo lakica, dok konyo lucan, mon ma coggi oto, ki lutino kic. Kit ma en onongo timo gin matir, tika en obedo labongo peko mo?

Yubu onongo pe ngeyo ni Catan Larac-ci tye ka nene. Jehovah owaco bot Catan ni: ‘Ineno laticca Yubu? Pe tye ngat mo macalo en i wi lobo. En winyo lokka dok timo gin ma atir.’ Catan ogamo ni: ‘Yubu pe wori nono. In igwoke dok imiyo mot mapol bote. Imiyo bote ngom malac ki leyi mapol. Ka ikwanyo jami magi ducu, en biweko wori woko.’ Jehovah owaco ni: ‘Itwero temo Yubu. Ento myero pe ineke.’ Pingo Jehovah oye ni Catan otem Yubu? En onongo tye ki gen ni Yubu bicung matek.

Catan ocako temo Yubu ki pekki mapatpat. Mukwongo, en ocwalo jo Ceba me kwalo dyangi ki kana pa Yubu. I ngeye, mac owango romi pa Yubu ducu. Jo mukene ma kilwongogi ni jo Kaldaya gukwalo kinagane ducu. Lutic ma gubedo ka gwoko lee magi kinekogi woko. I ngeye, peko madit loyo opoto. Lutino pa Yubu onongo gitye ka cam ki ka mato kongo ci ot ma onongo gitye iye-ni opoto i wigi onekogi woko ducu. Yubu cwinye oton ma pe wacce, ento en pe oweko woro Jehovah.

Catan onongo pud mito ni Yubu oden can makato meno. Pi man, en oweko bur maraco oonyo i kom Yubu, dok man okelle arem malit.  En onongo pe ngeyo gin mumiyo jami magi ducu tye ka timme i kome. Ento, kadi bed kit meno Yubu pud omedde ki woro Jehovah. Lubanga oneno jami magi ducu ci cwinye obedo yom i kom Yubu.

I nge meno, Catan ocwalo co adek me temo Yubu. Guwacce ni: ‘In nen calo itimo bal ci itemo kanone woko. Lubanga aye tye ka pwodi.’ Yubu ogamo ni: ‘An pe atimo gin mo marac.’ Ento en ocako tamo ni Jehovah aye tye ka kelo pekki magi i kome dok en owaco ni Lubanga tye ka tero en i yo marac.

Eliu, laco mo ma mwakane pud pe dit tutwal onongo obedo ka winyo lokgi laling. Dong en ocako lok kun wacci: ‘Lok ma wun ducu wuloko pe tye kakare. Dit pa Jehovah pe watwero ngeyone. En pe twero timo gin mo marac. En neno jami ducu dok konyo dano ki cobo pekkigi.’

I ngeye, Jehovah oloko ki Yubu. En owacci: ‘I kare ma aketo lobo ki polo onongo in itye kwene? Pingo iwaco ni an pe angolo kop atir? Iloko, ento pe ingeyo pingo jami magi timme.’ Yubu oye balle ci owaco ni: ‘Aloko marac. Onongo awinyo lok i komi, ento man dong angeyi maber. Pe tye gin mo ma timone loyi. Timma kica pi lok ma aloko.’

I kare ma atematema okato, Jehovah ocango two pa Yubu dok omiye lwak jami mapol makato maca ma en onongo tye kwede. Yubu okwo pi kare malac dok ki yomcwiny. Jehovah omiyo gum bot Yubu pi bedo lawiny kadi jamine pe obedo yot. Tika ibibedo calo Yubu kun imedde ki woro Jehovah kadi ningo?

‘Wutyeko winyo kit ma Yubu yam ociro kwede can, dok wuneno kit ma Jehovah omiye kwede mot i agikkine.’​—Yakobo 5:11