Cit atir i jami ma tye

Cit atir ka ma nyuto lok ma tye iye

 PWONY ME 51

Ladit Wi Mony ki Latin Anyaka Matidi

Ladit Wi Mony ki Latin Anyaka Matidi

I lobo Ciria, onongo tye latin nyako mo ma Laicrael ma bedo ka mabor ki pacogi. Lumony me Ciria gukwanye woko ki bot jo ganggi, dong en odoko latic pa dako pa ladit wi mony ma nyinge Naaman. Latin anyaka-ni onongo woro Jehovah, kadi bed dano ma i ngete ducu pe giworo Jehovah.

Naaman onongo tye ki two mo marac ma kilwongo ni dobo, dok bedo ki arem kare ducu. Latin anyaka-ni onongo mito konyo Naaman. En owaco bot dako pa Naaman ni: ‘Angeyo ngat mo ma twero cango two pa cwari. I lobo Icrael, tye lanebi pa Jehovah ma nyinge Elica. En twero cango two dobo pa cwari.’

Dako pa Naaman otito bot Naaman gin ma latin anyaka-ni owaco. Naaman onongo tye atera me temo gin mo keken ma weko ecang, pi meno en ocito wa i ot pa Elica i lobo Icrael. Naaman onongo tamo ni Elica bijole calo welo ma pire tek. Ento me ka lok bote wang ki wang, Elica ooro laticce ni omot Naaman dok omi bote kwena man ni: ‘Citi  ilwokke i Kulu Jordan tyen abiro. I nge meno komi biroc dok kakare.’

Cwiny Naaman otur woko. En owaco ni: ‘Onongo atamo ni lanebi-ni bicango twona ki lwongo nying Lubangane kun wito cinge i wiya tungi ki tungi. Me ka meno, en owaco ni acit alwokke i kulu mo i Icrael. Watye ki kulu mabeco loyo i Ciria. Pingo pe acit alwokke kunnu?’ Kiniga omako Naaman matek, ci oa woko ki i ot pa Elica.

Lutic pa Naaman gukonye me loko tamme. Guwaco bote ni: ‘Pe itye atera me timo gin mo keken wek komi ocang woko? Gin ma lanebi-ni owaco ni itim obedo gin ma yot. Pingo pe itim atima?’ Naaman owinyo lokgi. En ocito i Kulu  Jordan ci olutte i pii tyen abiro. I nge tyen me abirone, Naaman okatti woko ki i pii ma kome ocang woko maber. En obedo ki pwoc madit, dok odok cen ka pwoyo Elica. Naaman owaco ni: ‘An dong angeyo ni Jehovah keken aye Lubanga me ada.’ In itamo ni latin anyaka me Icrael-li owinyo nining i kare ma Naaman odok cen ma ocang woko?

“Wer ma litino lukere ki litino ma pud dot giwero me paki ber atika.”​—Matayo 21:16