Cit atir i jami ma tye

Cit atir ka ma nyuto lok ma tye iye

 PWONY ME 81

Pwony me Wi Got

Pwony me Wi Got

I nge yero lukwenane 12, Yecu olor piny ki i wi got ci ocito ka ma lwak dano mapol gugure iye. Onongo gua ki i Galilaya, Judaya, Turo, Cidon, Ciria, ki loka kulu Jordan. Gukelo jo ma tye ki two mapat pat ki cen maraco. Yecu ocangogi ducu. I ngeye, en obedo i kor got ci ocako pwonyogi. En otito gin ma myero watim ka wamito bedo lurem Lubanga. Omyero waniang ni wamito Jehovah i kwowa dok wapwonnye me marre. Ento pe watwero maro Lubanga ka pe wamaro jo mukene. Omyero wabed lukica dok water dano maber, kadi bed gin lumonewa.

Yecu owaco ni: ‘Pe myero imar luremi keken. Omyero imar lumoneni dok itim botgi kica ki cwinyi ducu. Ka ngat mo tye ki lok i komi, cit bote cutcut ci ikwa kica. Ter jo mukene kit ma imito ni guteri kwede.’

 Yecu bene omiyo ki dano tam maber i kom jami me kom. En owaco ni: ‘Bedo larem Jehovah pire tek loyo bedo ki cente madwong. Lakwo twero kwalo cente woko, ento pe tye ngat mo ma romo kwalo liremwu ki Jehovah. Pe ibed ki par pi gin ma ibicamo, ibimato, nyo ibiruko. Kong inen winyo, Lubanga kare ducu miyo botgi cam muromo. Bedo ki par mapol pe bimedo kadi nino acel i kwoni. Wi pe owil ni Jehovah ngeyo gin ma imito.’

Lwak ma naka yam onongo pud peya guwinyo ngat mo ka miyo pwony calo Yecu. Lutela dinigi onongo peya gupwonyogi jami magi. Pingo Yecu obedo lapwony madit? Pien jami ducu ma en opwonyo oa ki bot Jehovah.

“Wuting yatta, ci wupwony kita, pien an awor, dok amwol bene i cwinya, mumiyo wun bene wubilimo yweyo i cwinywu.”​—Matayo 11:29