Yam onongo tye laco mo i Cecaria ma nyinge Kornelio, ma obedo ladit mony me Roma. Kadi bed en pe obedo Lajudaya, Lujudaya onongo giwore mada. En yam miyo jami mapol me konyo lucan. Kornelio onongo ye i kom Jehovah dok lego bote kare ducu. I nino mo acel, lamalaika onen bot Kornelio ci owaco ni: ‘Lubanga owinyo legani. Kombeddi dong icwal dano i boma me Jopa, ka ma Petero tye ka bedo iye, wek gukele boti.’ Cutcut, Kornelio ooro co adek i Jopa, ma tye mairo 30 tung kupiny me Cecaria.

I Jopa, Petero oneno ginanyuta. En oneno leeyi mogo ma cik pe ye ni Lujudaya gucam, ci owinyo ka dwan mo wacce ni ocam. Petero okwero woko kun wacci: ‘Ento ma naka yam peya acamo lee mo ma pe leng.’ Dwan meno owacce ni: ‘Pe iwac ni lee magi pe leng. Lubanga otyeko lonyogi woko.’ Cwiny maleng owaco bot Petero ni: ‘Jo adek gitye i doggola. Cit kwedgi.’ Petero ocito i doggola ci openyo co magi tyen lok mumiyo gubino ka yenye. Gugamo ni: ‘Kornelio, ladit mony pa Luroma,  aye oorowa boti. Myero ibin i ode i Cecaria.’ Petero ojolo jo magi i ot macalo welone. Orwone, en ocito kwedgi i Cecaria, kacel ki omege mogo ma gibedo i Jopa.

I kare ma Kornelio oneno Petero, en ogungo i nyim Petero. Ento Petero owacce ni: ‘A malo! An bene adano adana calo in. Lubanga owacca ni abin i gangi kadi bed Lujudaya pe gidonyo i odi pa Lurok. Dong tita pingo ilwonga kany.’

Kornelio owaco bot Petero ni: ‘Nino angwen mukato angec onongo atye ka lego Lubanga, ci lamalaika owacca ni acwal dano wek guomi. Tim ber ipwonywa lok pa Jehovah.’ Petero owaco ni: ‘Adada aniang atir ni Lubanga pe poko kin dano. En jolo jo ducu ma gimito wore.’ Petero opwonyogi jami mapol i kom Yecu. Ka dong cwiny maleng opye i kom Kornelio ki jo ducu ma gitye kacel kwede, ci kibatija gin ducu.