Surat ha mga Taga-Filipos 3:1-21
3 Ha kataposan, mga kabugtoan ko, padayon nga magrayhak kamo ha Ginoo.+ Diri ako ginkakapoy pagsurat ha iyo han amo gihapon nga mga butang, ngan proteksyon ito ha iyo.
2 Pag-ikmat kamo ha kaayaman; pag-ikmat ha mga nagbubuhat hin nakakadaot; pag-ikmat ha mga nagsasamad han unod.+
3 Kay kita an may-ada tinuod nga pagturi,+ kita nga nagbubuhat han sagrado nga pag-alagad pinaagi han espiritu han Dios ngan naghahambog mahitungod kan Kristo Jesus+ ngan diri nagbabasar han aton pagsarig ha unod,
4 bisan kon may mga hinungdan ako ha pagsarig ha unod kay ha bisan hin-o.
Kon may iba pa nga tawo nga naghuhunahuna nga may mga hinungdan hiya ha pagsarig ha unod, labi na gud ako:
5 ginturi ha ikawalo ka adlaw,+ tikang ha nasud han Israel, tikang ha tribo ni Benjamin, usa nga Hebreo nga natawo tikang ha mga Hebreo;+ mahitungod han balaud, usa nga Pariseo;+
6 mahitungod han kadasig, gintimaraot ko an kongregasyon;+ mahitungod han pagkamatadong basado ha balaud, ginpamatud-an ko nga waray ikasaway ha akon.
7 Pero an mga butang nga may bentaha ha akon, gintatagad ko nga waray pulos* tungod han Kristo.+
8 Dugang pa, gintatagad ko gud liwat nga waray pulos an ngatanan nga butang tungod han mas daku nga bili han kahibaro mahitungod kan Kristo Jesus nga akon Ginoo. Tungod ha iya ginbayaan ko an ngatanan nga butang ngan gintatagad ko ito sugad nga mga basura,* basi magkaada ako duok nga relasyon ha Kristo
9 ngan magin kahiusa niya, diri tungod han akon pagkamatadong pinaagi han pagsunod ha Balaud, kondi tungod han pagkamatadong pinaagi han pagtoo+ ha Kristo,+ an pagkamatadong tikang ha Dios nga iginbasar ha pagtoo.+
10 Katuyoan ko nga mahibaro mahitungod ha iya ngan han gahum han iya pagkabanhaw+ ngan makiangbit ha iya mga pag-antos,+ igintutubyan an akon kalugaringon ha kamatayon pariho han iya kamatayon,+
11 basi makita kon posible gud nga makarawat ko an mas temprano nga pagkabanhaw tikang ha mga patay.+
12 Diri nga nakarawat ko na ito o nagin perpekto na ako, kondi nangangalimbasog ako+ basi makita kon makakab-ot ko liwat ito nga tungod hito ginpili ako* ni Kristo Jesus.+
13 Mga kabugtoan, diri ko ginhuhunahuna nga nakaptan ko na ito; pero usa nga butang an sigurado: Ginkakalimtan ko an mga butang nga ginbayaan+ ngan gin-aabot ko an mga butang ha unhan,+
14 nangangalimbasog ako nga makab-ot an akon tumong basi makarawat an premyo+ nga langitnon nga pagtawag+ han Dios pinaagi kan Kristo Jesus.
15 Salit an mga hamtong ha aton+ magkaada hini nga panhunahuna, ngan kon iba an iyo panhunahuna ha anoman nga paagi, ipapahayag ha iyo han Dios an husto nga panhunahuna.
16 Pero anoman nga pag-uswag an aton nahimo, padayon kita nga maglakat hin maopay ha amo gihapon nga paagi.
17 Mga kabugtoan, urosa nga magsubad kamo ha akon+ ngan kitaa niyo pirme an mga naglalakat ha paagi nga uyon ha susbaranan nga amon iginpakita ha iyo.
18 Kay damu an naglalakat sugad nga mga kaaway han pasakitan nga kahoy* han Kristo, agsob ko hira unabihon hadto pero yana gin-uunabi ko gihap hira upod an pagtangis.
19 Kabungkagan an ira kataposan, ngan an ira dios amo an ira tiyan, ngan an ira kadungganan ha pagkamatuod amo an ira kaarawdan, ngan an ira ginhuhunahuna amo an mga butang ha tuna.+
20 Pero ha langit+ an aton pagkatuminungnong,+ ngan ginhuhulat gud naton an usa nga paratalwas tikang didto, an Ginoo nga hi Jesu-Kristo,+
21 nga magbabag-o han aton maluya nga lawas basi magin pariho han* iya mahimayaon nga lawas+ pinaagi han iya daku nga gahum, nga nagpapahinabo ha iya nga magin sakop niya an ngatanan nga butang.+
Mga footnote
^ O posible nga “kinaburut-on nga iginsalikway ko.”
^ O “hugaw.”
^ Lit., “ginkaptan ako.”
^ Lit., “basi maipahiuyon ha.”
